Билэр киһитэ уорууга уорбаланар

Ааптар: 
Бөлөххө киир:

Сайтпытыгар бэҕэһээ эрэ суруйбуппут, «мобильнай баан» өҥөтө холбоно сылдьар төлөпүөннэриттэн харчы уоралларын туһунан. Өссө биир итинник түбэлтэ Уус Маайа улууһугар тахсыбыт. 

edersaas.ru

Ол курдук, Уус Маайа улууһун полициятыгар 35 саастаах киһи кини баанын каартатыттан харчы уорбуттарын туһунан сайабылыанньа киллэрбит. Кини ону банкоматтан харчы устаары билбит.

Оперативниктар бу уорууга уорбалаан, сүтүктээх 31 саастаах билэр киһитин туппуттар.

Барыллаан быһаарыынан, ити күн уорбаланааччы дьиэтигэр бу дьон иккиэн арыгылаабыттар. Онтон ыалдьыт суотабай төлөпүөнүн манна умнан хаалларан, дьиэтигэр барбыт.
Сарсыныгар төлөпүөнэ сүппүтүн өйдөөн көрбүт эрээри, ханна эрэ аара суолга сүттэҕэ диэн көрдүү да барбатах. Оттон анараа киһи сүтүктээх төлөпүөнүн ирдэспэтин билэн, кини «мобильнай баанын» нөҥүө 18.700 солк. харчыны устубут.

Бу чахчынан «уоруу» ыстатыйанан холуобунай дьыала тэриллибит. Бу ыстатыйанан көрүллэр накаастабыл миэрэ — 5 сылга диэри көҥүлү быһыы.

Бу туһунан СӨ ИДьМ-тын пресс-сулууспата иһитиннэрдэ.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0