«БиисинэcЭкспо-2019» кыттыылаахтара — ыччаттар

Ааптар: 
Бөлөххө киир:

Бу күннэргэ «Кыайыы 50 сыла» спортивнай кииҥҥэ икки күнү быһа олохтоох табаары уонна бородууксуйаны оҥорон таһаарааччылар «БиисинэсЭкспо-2019» үгэс буолбут сылы түмүктүүр быыстапкалара буолла.

 edersaas.ru

Өрөспүүбүлүкэ 18 улууһуттан 60-ча урбаанньыт, тэриллиилээх хаһаайыстыбалар, оскуола бизнес-инкубатордарын оҕолоро кэлэн, Дьокуускай куорат олохтоохторун уонна ыалдьыттарын бэйэлэрин оҥорон таһаарар табаардарынан, оҥоһуктарынан сөхтөрдүлэр. Кырдьык, мантан атыннык сыаналаабаккын – сөхтөрдүлэр!

Манна туох суоҕуй: мыылаттан миэбэлгэ, сакалааттан-кэмпиэттэн саха быһаҕар тиийэ талбытыҥ барыта баар. Оттон аһы-үөлү, көмүс оҥоһугу этэ да барбаккын.

Киһи кэрэхсиэҕэ, быйылгы быыстапка атыттартан чыҥха атын – олохтоох бородууксуйаны оҥорон таһаарааччы элбээбит даҕаны! Аны бородууксуйаларын анал араас тэриллээх, ааттаах-суоллаах фабрикаттан киһи араарбат. Биһиэннэрэ үксүлэрэ дьиэ усулуобуйатыгар үлэлииллэрин үгүспүт билэ-көрө сылдьабыт эбээт. Суута-хаҕа, суруга-бичигэ – киһи хараҕын сымнатар, хаачыстыбалаах табаары ылан, сүргэҥ көтөҕүллэр.

Быйылгы быыстапкаҕа ордук ыччат элбэҕэ сөхтөрдө. Алтыс кылаас оҕолоруттан саҕалаан, хардыы аайы орто саастара — 26-лаах эдэр дьон. Бу — дьоҕус бизнес ыччат илиитигэр толору киирбитин туоһута.

Тэрийээччилэр Саха сирин улуустарын географиятын учуоттаабыттара харахха быраҕыллар, Ол курдук, Бүлүү эҥэртэн, хоту улуустартан, киин оройуоннартан – барытыттан бааллар.

Дьону кытта кэпсэтэн баран, үгүстэр бородууксуйаларын өрөспүүбүлүкэ таһыгар батарар баҕалаахтарын бэлиэтээтим. Онон ««БиисинэсЭкспо-2019» тэрээһин аһыллыытыгар Урбаан, эргиэн уонна туризм миниистирин солбуйааччы Ирина Гаргач: ЭкспортНациональнай бырайыак чэрчитинэн урбаанньыттарбыт оҥорор таһаарар бородууксуйаларын өрөспүүбүлүкэ таһыгар, омук сиригэр батарар сорук турар», — диэн бэлиэтээбитэ олохтооҕо көһүннэ.

Тэрээһини «Мин биисинэһим» киин тэрийэн ыытар. Бу тэрилтэ үлэһиттэрэ улуустартан кэлбит урбаанньыттарга босхо сэминээрдэри, “төгүрүк остуоллары” ыыттылар. Тиэмэлэр да киһи кэрэхсиир ис хоһоонноохтор: «Саха сиригэр дьоҕус биисинэһи хайдах сайыннарыахха?», «Түмүгү ситиһэргэ кыахтаах хамаанданы хайдах тэрийиэххэ?», «Атыылаһааччыны бэйэҕэ тардыы кистэлэҥэ», «Саҥа сүүрээни тобулуу ньымата». Ол эрээри үгүс урбаанньыт атыылаһааччытыгар болҕомто уурар буолан, бу тэрээһиннэртэн көрө матта диэххэ сөп. Оччотугар кими үөрэппиттэрэ буолла диэн санаа үөскүүр. Буолаары буолан, иккис этээскэ. Оттон бу кэмҥэ бастакы этээскэ урбаанньыт атыытын батараары түбүгүрэ сылдьар.

Онон биир бэйэм быыстапкаҕа кыттар дьону барыларын түмэн баран, бу маннык дьыалабыай кэпсэтиилэри быыстапка буолуон иннинэ күн тэрийбиттэрэ буоллар, быдан көдьүүстээх буолуо эбит дуу диэн санааҕа кэллим. Оччотугар маастар-кылаастары, сэминээрдэри ыытар уопуттаах урбаанньыттар сүбэлэрин эдэр дьон дьыалатыгар – табаардарын батарар кэмнэригэр туһаныахтара хаалла.

Тэрээһин түмүгүнэн урбаанньыттар «Бастыҥ стэндэ», «Бастыҥ дэлэгэй ас көрүҥэ», «Табаарын бастыҥ хамаҕатык батарааччы» курдук номинацияларынан бэлиэтэннилэр.

Елена ПОТОЦКАЯ, «Саха сирэ» хаһыат, edrsaas.ru

Хаартыскаҕа ааптар түһэриитэ.

+1
0
+1
0
+1
0
+1
0
+1
0
+1
0
+1
0