Бүгүн, 15 чааска, өрөспүүбүлүкэҕэ коронавирус балаһыанньатын туһунан иһитиннэриитин кэмигэр, СӨ бырабыыталыстыбатын бэрэссэдээтэлин солбуйааччы Ольга Балабкина Саха сиригэр суукка устата 80 киһи ыарыйда диэн эттэ.
edersaas.ru
Итинтэн 47 киһи Дьокуускай куоракка, 33 киһи улуус олохтоохторо. “Улуустарга бэлиэтэммиттэр үгүстэрэ Нам улууһугар буолар. Онно Ил Дархан ыйааҕынан харантыын биллэриллибитэ. Күн бүгүн Намнааҕы стационарга, Дьокуускай куоракка эмтэнээччилэр бааллар. Нам киин балыыһатын быраастарын көмөлөрүнэн тастан эмиэ эмтэнэллэр”, — диэн эттэ итиэннэ Салбаҥ нэһилиэгин олохтоохторун тулуйуҥ, ыарыы күөдьүйбэтин туһугар харантыын ирдэбилин кытаанахтык тутуһуҥ диэн ыҥырда.
Ордук болоҕомтону коронавирус биирдиилээн бэлиэтэнэр улуустарыгар уурда. Манна салгыы тарҕанан эрэрин ыйар. Таатта улууһугар 4 киһи ыалдьыбыта бэлиэтэнэрин эттэ. Мэҥэ Хаҥалас улууһугар биир-икки киһинэн ыалдьыбыт киһи ахсаана эбиллэ турарын ыйда. Үөһээ Бүлүүгэ эмиэ үксүү турарын эттэ.
Мииринэй, Нерюнгри, Алдан курдук бырамыысыланнай оройуоннарга ыалдьыбыт дьон ахсаана үксүгэр баахтанан үлэлиир, кэлии үлэһиттэри кытта сибээстээҕин бэлиэтиир. Өрөспүүбүлүкэҕэ 5,5 тыһыынча киһи үлэлии кэлэр, олору барыларын кэтиибит эрээри, тастан ыарыы син биир кэлэр диэн этэр.
Онтон улуустарга тастан киллэрэллэр. Бары тэрилтэ салайааччыларыгар туһаайан, командировкаҕыт кыраапыгын хаттаан көрүҥ, аҕыйатыҥ диэн эттэ.
Дьокуускай куоракка дьиэ кэргэнинэн, бөлөҕүнэн ыалдьыы элбэх диир. Онон санитарнай-эпидемиологическай нуорманы тутуһары күүһүрдүҥ диэн нэһилиэнньэҕэ туһаайда.