Саха сиригэр от ыйын 3 күнүттэн оскуоланы бүтэрбит оҕолор биир кэлим эксээмэни туттарыылара саҕаланар.
Өрөспүүбүлүкэҕэ барыта 7968 выпускник баар. Итинтэн 5991 оҕо эксээмэн туттар баҕалааҕын биллэрбит. Быйыл коронавирус дьаҥыттан сылтаан биллэриллибит хааччахтар учуоттананнар, биир кэлим эксээмэни тутуу ураты ирдэбиллэрдээх буолуоҕа диэн иһитиннэрэн тураллар.
Бэс ыйын 16, 25, 26 күннэригэр судаарыстыбыннай эксээмэннэри тутар пууннарга, оҕолору кыттыһыннарбакка туран, эксээмэни тутуу ньымаларын бэрэбиэркэлээн, тургутан көрбүттэрэ. Бэс ыйын 29 күнүгэр, бүтэһиктээх тургутууга, эксээмэн тутуохтаах 198 пуун бэрэбиэркэни ааспыта.
СӨ Үөрэҕин уонна наукатын миниистирэ Михаил Сивцев: «Быйыл БКЭ-ни үрдүк үөрэххэ туттарсар баҕалаахтар эрэ туттараллар. Оттон көннөрү аттестат ылыан баҕалаахтар, биир кэлим эксээмэнтэн аккаастаннылар”, — диэтэ, эксээмэн тутар пууннар быйыл былааннаммыт ахсааннарыттан аҕыйахтарын эттэ.
БКЭ убаастанар биричиинэнэн кыайан туттара кэлбэтэх оҕолор атырдьах ыйыгар туттарыахтарын сөп. Оттон эксээмэни хос туттарыы быйыл суох.