Төрөппүттэр биир кэлим эксээмэни хайдах сыаналаатылар?

Ааптар: 
Бөлөххө киир:

Дьокуускай куорат үөрэнээччилэрэ дьаҥынан сибээстээн, харантыыҥҥа олороллор. Оттон бүгүн Дьокуускайдааҕы национальнай гимназияҕа балачча элбэх төрөппүт муһунна. Манна бүгүн кинилэр биир кэлим эксээмэн диэн тугун аан бастакытын харахтаан көрөллөр.

edersaas.ru

Тимири көрдүүр тэрил, пааспарынан  киирии, ыйыллыбыт аудиторияларынан олоруу, эксээмэн былааҥкатын толоруу – быһатын, үөрэнээччилэргэ биир кэлим эксээмэн хайдах ыытыллар да, ол курдук. Арай, атына диэн бэриллибит бириэмэлэрэ эрэ кылгас итиэннэ сорудаҕа аҕыйах.

Аахсыйа сүрүн сыалынан – оскуоланы бүтэрээччигэ көмөлөһүү, төрөппүккэ уонна уопсастыбаннаска эксээмэн хайдах быһыылаахтык барарын илэ харахтарынан көрдөрүү буолар. Ханнык баҕарар эксээмэҥҥэ оҕо уйулҕа өттүнэн бэлэмнээх буолара туһалааҕын уруккуттан ыйаллар. Маныаха дьиэ кэргэн, төрөппүт көмөтө улахан оруоллаах диэн исписэлиистэр бэлиэтииллэр.

Эксээмэн туттарар пуун салайааччыта Тамара Михайлова иһитиннэрбитинэн, гимназия аахсыйаҕа номнуо төрдүс сылын кыттар эбит. Бу күн гимназияҕа икки аудиториянан, уопсайа, 45 төрөппүт эксээмэн туттарбыт. “Сорудах электроннай буочтанан кэлбитэ, сарсыарда биирдэ арыллыбыта. Онон сорудах ис хоһоонун билбэппит. Аудиторияҕа миэстэтигэр арыллар”, — диэн быһаарда.

Тэрээһин Бүтүн Арассыыйатааҕы “Төрөппүттэр БКЭ-ни туттарар биир күннэрэ” аахсыйа иитинэн ыытыллар. Саха сиригэр бу иннинэ төрөппүттэр нуучча тылыгар, математикаҕа холоммуттара. Бүгүн устуоруйаны туттардылар.

Эксээмэнтэн тахсааттарын кытта, суруналыыстар тиийэн, кыттааччылар санааларын туоһуластыбыт. Быйыл үһүс сылын аахсыйаҕа кыттар СӨ үөрэҕин уонна наукатын миниистирэ Владимир Егоров: “Устуоруйа балачча уустук биридимиэт. Нуучча тылын, математиканы кытта тэҥнээтэххэ, устуоруйаны  100 баалга туттарар оҕо сэдэх. Устуоруйаҕа эксээмэн хайдаҕын көрдүм уонна бэлэмнээх оҕо үрдүк баалга туттарыан сөп эбит дии санаатым. Бүгүн төрөппүттэр эксээмэн ыытыллар пуунугар киириини, бланканы толорууну, эксээмэн хайдах ааһарын барытын билистилэр”, — диэн үллэһиннэ итиэннэ эксээмэн иннинээҕи күн демо-эксээмэни, биир кэлим эксээмэннэргэ бэлэмнэнэргэ аналлаах саайтары көрбүтүн, кыратык бэлэмнэммитин иһитиннэрдэ.

Төрөппүт Юрий Афанасьев: “Гимназияҕа киириигэ ирдэбиллээх соҕус этилэр. Төлөпүөммүтүн барытын туттаран баран киирбиппит, иннибитигэр-кэннибитигэр барыта камера. Сорудаҕа оннук үлүгэр ыарахан дии санаабатым, бэлэмнэммит киһи туттарыан сөп эбит”, — диэн кэпсиир.

Эксээмэн туттарбатах ырааппыт эбит. Биһиги саҕана биир кэлим эксээмэн (ЕГЭ) диэн суоҕа. Эксээмэн иннинээҕи толоруута бытаан эрээри, наадалаах эбит, барыта быраабыланан буолуохтаах. Ити туһунан оҕолорго кэпсиэххэ наада уонна бириэмэни сөпкө аттараллара ирдэнэр эбит. Төрөппүттэргэ эксээмэн бириэмэтэ кыччаабыт буолан, биир чаас бэриллибитэ. 11 сорудахтаах, онтон тоҕуһа кылгас хоруйдаах, иккитэ кылгас өйтөн суруйуу курдук. Бэриллибит бириэмэ туолла да, үлэни хомуйан ылаллар, устубатаххын учуоттаабаттар. Онон оҕолор бириэмэлэрин сөпкө аттаралларын, ыраас илиискэ усталларыгар бириэмэ ордоруналларын курдук сүбэлиир ирдэнэр эбит диэн түмүккэ кэллим, — диэн төрөппүт Гаврил Дмитриев санаатын үллэстэр.

Төрөппүттэр эксээмэн хайдах барарын илэ харахтарынан көрдүлэр. Биир даҕаны төрөппүт “шпаргалканы” туһамматах, кэһиини таһааран ааспыт сыллааҕы курдук, эксээмэнтэн үүрүллүбэтэх.  Түмүгэр, кыттыбыттарын туоһулуур сэртипикээттэри туттулар. Эксээмэн түмүгэ олунньу 21 күнүгэр биллиэҕэ.

Людмила ПОПОВА, edersaas.ru

Хаартыска: СӨ Үөрэҕин уонна наукатын пресс-сулууспата, ааптар.

+1
0
+1
0
+1
0
+1
0
+1
0
+1
0
+1
0