Былатыан Ойуунускай аатынан Саха тыйаатыра олунньу 6 күнүгэр киэһэ 6 чаастан Софья Сергучева-Баранова “Биэс чаҕыл сулуспут” ахтыы моно-испэктээгэр тыйаатыр аччыгый саалатыгар ыҥырар.
edersaas.ru
Моно-испэктээккэ М. С. Щепкин аатынан театральнай үрдүкү үөрэх маҥнайгы устуудьуйатын 1955 сыллаахха бүтэрбит, Саха тыйаатырын норуокка биллэр артыыскалара: Саха АССР норуодунай артыыската Александра Иванова, Саха АССР үтүөлээх артыыската Аксинья Адамова, РСФСР үтүөлээх артыыската, СӨ норуодунай артыыската Анна Кузьмина, Саха АССР үтүөлээх артыыската Мария Канаева уонна Саха АССР үтүөлээх артыыската Татьяна Мыреева айар үлэлэрин уонна олохторун туһунан кэпсэнэр.
Саха сирин үтүөлээх артыыската, М.Щепкин аатынан театральнай училище үһүс устуудьуйатын бүтэрбит Софья Сергучева-Баранова кинилэр көлүөнэлэрин кытары бииргэ үлэлээбит түгэннэриттэн кэпсиэҕэ.
Моно-испэктээкили РФ, СӨ үтүөлээх артыыската Лена Сергеева-Румянцева уонна СӨ үтүөлээх артыыската Зоя Попова туруордулар.
Сыана уонна көстүүм худуоһунньуга – Дария Дмитриева.
Леонтий Мотхонов уотунан киэргэттэ.
Александр Решетников музыканан киэргэттэ.
Софья Баранова 2017 сыллаахха Саха тыйаатырыгар Александр Титигиров туруорбут «Алгыстаах этинии» моно-испэктээгэр оонньоон, көрөөччүлэр биһирэбиллэрин ылбыта. Онон, кини моно-испэктээк курдук дыраама маннык уустук, сэдэх жанрыгар номнуо уопуттаах артыыска.
ЫСПЫРААПКА:
София Баранова – «Уол куолакал», “Алгыс”, “Кэнчээри-1966”, “Уһуктуу» драматическай айымньылар ааптардара.
2015 сыллаахха “Уол куолакал” диэн бэйэтин суруйуутугар уонна режиссуратыгар туруоруллубут историческай дырааманан үбүлүөйүн көрсүбүтэ. Бу – XIX уонна XX үйэлэр саҥатынааҕы сахалар итэҕэллэрин туһунан кэпсиир бастакы испэктээк этэ.
«Уһуктуу» дырааматын «Кыһыл көмүс» мааска бириэмийэ лауреата Сергей Потапов туруорбута. Бу треш-дыраама эмиэ араас элэмиэннэрдээх, режиссер өттүттэн ураты көрүүлэрдээх буолан, көрөөччүнү соһуппута, араас мөккүөрдээх кэпсэтиини таһаарбыта.
Надежда ЕГОРОВА, “Саха сирэ”, edersaas.ru