Суотабай төлөпүөннэригэр «мобильнай баан» өҥөтүн туруоттарбыт дьон, уопсайынан, баан каарталаахтар түөкүттэр сиэртибэлэрэ буолаллара дэбигис. Дьон харчытын апчарыйыан баҕалаахтар сирэйдэрин тириитэ халыҥ — төлөпүөҥҥэр эрийэн, итэҕэтэр ахан куоластарынан кэпсэтэн отоойкоҕо олордоллор. Ордук кырдьаҕас дьону.
Вера МАКАРОВА, «Саха сирэ» хаһыат, https://edersaas.ru/
Бу дьыл тосхунньу 16 күнүгэр, киэһэ 18.00 чаас саҕана, Дьокуускай куорат полициятыгар 55 саастаах дьахтар кэлэн, кини баанын каартатыттан 40 тыһ. солк. кэриҥэ харчытын уорбуттарын туһунан сайабылыанньа суруйбут.
Кини кэпсээбитинэн, харчытын уордарыан биир чаас иннинэ төлөпүөнүгэр билбэт кыыһа эрийэн, «Киин биэнсийэ фондаттан сылдьабын» диэн ньылбаарбыт. Уонна «ааспыт ыйдааҕы биэнсийэҥ харчытын ситэ биэрбэтэхтэр» диэн баанын каартатын сорох дааннайдарын көрдөөбүт. Түөкүн буолбатаҕын дакаастаан, дьахтар аатын-суолун, баанын каартатын нүөмэрин доргуччу ааҕан иһитиннэрбит. Ону итэҕэйэн, эмсэҕэлээччи каартатын кэннигэр баар үс буукубалаах куодун этэн биэрбит. Сотору буолан баран, каартатыттан харчы устубуттарын туһунан смс-иһитиннэрии кэлбит.
Дьокуускай куорат полициятын пресс-сулууспата:
— Бу сыл саҕалыныаҕыттан киин куоракка номнуо түөрт итинник түөкүннээһин чахчыта бэлиэтэннэ. Маныаха эрийбит түөкүттэр нүөмэрдэрэ атын регионнарга регистрацияламмыттар. Полиция төһө эмит куруук сэрэтэрин үрдүнэн, итэҕэйимтиэ дьон син биир итинник түөкүттэр угаайыларыгар киирэн биэрэ турар. Болҕомтолоох буолуҥ! Сэрэххитин сүтэримэҥ! Билбэт дьоҥҥутугар бааҥҥыт каартатын туһунан, пааспаргыт дааннайдарын уонна да атын бэйэҕит тускутунан информацияны ончу биэримэҥ!
Вера МАКАРОВА, «Саха сирэ» хаһыат, https://edersaas.ru/
Хаартыска: интернеттэн