“Бичик” кинигэлэрэ “Сыл бастыҥ кинигэтэ: Сибирь-Евразия-2019” эрэгийиэннээҕи куонкуруска лауреат буоллулар

Бөлөххө киир:

Өрөспүүбүлүкэбит олохтоохторугар, кинигэни сөбүлээччилэргэ үөрүүлээх сонуммутун тиэрдээри тиэтэйэбит. Ааспыт нэдиэлэҕэ, балаҕан ыйын 12-14 күннэригэр Новосибирскай куоракка “Сыл кинигэтэ: СИБИРЬ-ЕВРАЗИЯ-2019” норуоттар икки ардыларынааҕы куонкурус ыытылынна. Бу күрэхтэһиигэ Арассыыйа араас эрэгийиэннэриттэн уопсайа 130 бырайыак кыттыыны ылла. Аан дойду муннуктарыттан суруйааччылар, поэттар, кириитиктэр Сибиирдээҕи кииҥҥэ мустан ааҕааччыларга араас маастар-кылаастары, кинигэ сүрэхтэниилэрин ыыттылар, экскурсияларга сырыттылар. Үс күн устата кинигэ дьаарбаҥкалара, култуурунай бырагыраамалар, форумнар, литературнай ссэминээрдэр ыытылыннылар.

Быйыл “Бичик” кинигэ кыһата хас да кинигэнэн тоҕус номинацияҕа кыттыбыт эбит буоллаҕына, үс бырайыага дипломант, биир кинигэ лауреат, онтон биир кинигэ интэриниэт-куоластааһыҥҥа кыайыылаах үрдүк аатын сүктэ.

Ол курдук, “Оҕолорго уонна оскуола үөрэнээччилэригэр аналлаах бастыҥ кинигэ” номинацияҕа ааҕааччы киэҥ араҥатыгар туһуламмыт таһаарыылар эрэдээксийэлэрэ таһаарбыт «Мамонт и другие древние животные Сибири: энциклопедия» кинигэлэрэ лауреат буолла. Бу энциклопедия матырыйаалларын хомуйааччыларынан А.В. Протопопов, Е.Н. Мащенко, Г.Г. Боескоров үлэлээтилэр. Онтон суруйааччы Виталий Егоров “По следам якутского Хейга” кинигэтэ интэриниэт-куоластааһыҥҥа кыайыылааҕынан ааттанна.

“Бастыҥ кыраайы үөрэтэр кинигэ” номинацияҕа «Шаманы – избранники Небес и духов» (ааптар Р.И. Бравина) призерунан ааттанна. Маны тэҥэ, “Нон-фикшн бастыҥ таһаарыыта” номинацияҕа «Республика Саха. Год 2017» ( хомуйан оҥорооччулар А. И. Лукинов, Э. Т. Мярикянов) альбом-кинигэ дипломунан уонна «Готовим счастье по рецепту» диэн биллэр фуд-фотограф Наталья Оконешникова кинигэтэ “Нон-фикшн бастыҥ таһаарыыта” номинацияҕа эмиэ дипломунан наҕараадаланнылар.

Оттон «Лучшее издание, вносящее вклад в развитие евразийского межкультурного сотрудничества» диэн номинацияҕа кыайыылааҕынан Сергей Прачев “Вернуть любовь: пьесы” кинигэтэ ааттанна.

“Сибирь-Евразия-2019” күрэхтэһии үтүө түмүктэрин истэн бары да олус үөрдүбүт, долгуйдубут.

“Бичик” Национальнай кинигэ кыһатын аатыттан салайааччы Август Егоров бары ааҕааччылары, кинигэ ааптардарын уонна кэллиэгэлэрин маннык үрдүк таһымнаах кинигэ куонкуруһугар кыайыылаах аатын ылбыккытынан ис сүрэҕиттэн эҕэрдэлиир уонна айар үлэҕитигэр өссө да үрдүк ситиһиилэри, үтүө түмүктээх үлэни баҕарар.

Наталья Протопопова, “Бичик” кинигэ кыһатын PR-менеджерэ.

+1
0
+1
0
+1
0
+1
0
+1
0
+1
0
+1
0