Бүгүн, ыам ыйын 29 күнүгэр, Дьокуускай куораппыт килбэйэр киинигэр — Автовокзал дьиэтигэр “Бичик” Национальнай кинигэ кыһатын саҥа маҕаһыына үөрүүлээхтик аһылынна.
edersaas.ru
Автовокзалга күн аайы элбэх киһи сылдьар, айанньыттар тохтуур, сынньанар сирдэринэн биллэр. Онон, маҕаһыын киин сиргэ арыллыбыта барыбытыгар олус табыгастаах.
Бу үөрүүлээх түгэҥҥэ “Бичик” кинигэ кыһатын салайааччыта Август Егоров, кылаабынай эрэдээктэр Валерий Луковцев, ааптардарбыт, “Кэскил” хаһыат кылаабынай эрэдээктэрэ, суруйааччы Евдокия Иринцеева-Огдо, Дьокуускайдааҕы “Арчы” дьиэтин дириэктэрэ Валентина Бочонина, “Чолбон” сурунаал кылаабынай эрэдээктэрин солбуйааччы Гаврил Андросов, Ариадна Борисова, Дмитрий Михайлов, Иван Андросов-Айанньыт, о.д.а. кыттыыны ыллылар. Кэлбит дьон, ыалдьыттарбыт бары маҕаһыын элбэх атыылаһааччылаах, үгүс ыалдьыттаах буоларыгар баҕардылар уонна “Бичик” кинигэ кыһатын үлэтэ өссө да үүнэ, сайда, кэҥии, хаҥыы турарыгар баҕардылар.
Саҥа маҕаһыын арыллыбытынан сибээстээн, “Бичик” маҕаһыыныттан бүгүн, сарсын, өйүүн бастакы атыыны оҥорбут дьоммут маҕаһыын аатыттан өйдөбүнньүк бэлэх тутуохтара. Ону таһынан сотору кэминэн, бэс ыйын 12-13 күннэригэр Дьокуускайга ыытыллыахтаах “Бичик үрүҥ түүннэрин” сүүйүүлээх аахсыйатыгар кыттыахтарын сөп. Ол эбэтэр, ыам ыйын 20 күнүттэн саҕалаан бэс ыйын 13 күнүгэр диэри “Бичик” маҕаһыыннарыттан 2.500 солк. сууматтан үөһээ бородууксуйаны атыыласпыт дьон аахсыйаҕа сүрүн бириистэр хаһаайыттарынан ааттаныахтара.
Мантан аллараа “Бичик” кинигэ кыһатын салайааччыта Август Васильевич бэйэтин санаатын үллэстэр:
– Бастатан туран, ааҕааччыларбытын барыларын самаан сайыммыт салаллан кэлбитинэн ис сүрэхпититтэн эҕэрдэлиибит! Сотору кэминэн үрүҥ тунах ыһыахтарбыт саҕаланыахтара, саамай үтүө, кэрэ кэмнэр үүннүлэр. Бүгүн дьон-сэргэ биир саамай сылдьар, тоҕуоруһар сиригэр Автовокзал дьиэтин 1 этээһигэр саҥа маҕаһыыны арыйдыбыт. Түгэнинэн туһанан, Автовокзал салайааччытыгар Саргылаана Ивановнаҕа күүс-көмө, өйөбүл буолбутугар дириҥ махталбытын тиэрдэбит! Биллэн турар, манна элбэх киһи сылдьыан, саҥаттан-саҥа кинигэлэрбитин атыылаһа туруохтарын баҕарабыт уонна Автовокзалга киирэн тахсыбыт дьон биһиги маҕаһыыммытын хаһан да тумнан ааспаккытыгар баҕарабыт! “Бичик” маҕаһыыннарыгар кинигэлэр эрэ буолбакка, араас сувенирдар, оҕоҕо аналлаах оонньуурдар, минньигэс астар, үрүҥ тунах ыһыахха аналлаах араас мал-сал о.д.а. барыта атыыланар. Билигин биһиги Кытай өрөспүүбүлүкэтин кытта кэпсэтэн, сүрдээх элбэх тэрилтэни кытта дуогабардаһан, оонньуурдары, сувенирдары оҥорторо сылдьабыт. Онон, биһиги маҕаһыыммытыгар кэллэххитинэ, олус элбэх интэриэһинэйи билиэххит, өй-санаа, духуобунас өттүнэн байан-тайан тахсыаххыт, билиигит-көрүүгүт кэҥиэҕэ диэн эрэннэрэбин.
Евдокия Иринцеева-Огдо, “Кэскил” хаһыат кылаабынай эрэдээктэрэ, суруйааччы, хас да кинигэ ааптара:
– Бүгүн сахалыы тыллаах дьоҥҥо өрөгөйдөөх күн үүннэ. Тоҕо диэтэххэ, кини иэйэр-куойар, ааҕар эйгэҕэ сыстыбыт эбит буоллаҕына, киниэхэ улахан бырааһынньык. Тоҕо диэтэххэ, кинигэ бу өссө биир маҕаһыына аартык ааныгар Автовокзал дьиэтин иһигэр арыллыбыта олус табыгастаах дии саныыбын. Киһи барыта куоракка киирэн анаан-минээн кинигэ маҕаһыынын кэрийбэт. Онуоха бу таарыччы ааһан иһэн, саҥа суруллубуту, саҥа кинигэлэри киирэн көрөрүгэр, атыылаһан ааһарыгар олус үчүгэй усулуобуйа олохтообуттар эбит диэн тус бэйэм олус үөрэбин. “Бичик” кинигэ кыһата уонна биһиги хаһыаппыт урут-уруккуттан доҕордуу сыһыаннаахпыт, онон өрүү “Бичиктэрбин” чугастык, күндүтүк саныыбын. Итиэннэ биһиги бүгүҥҥү күҥҥэ “суруйааччы” диэн биллэр, аатырар эбит буоллахпытына, чахчыта да “Бичик” кыһата баар буолан биһигини суруйааччы гыннаҕа, ааҕааччыга тиксиһиннэрдэҕэ диэн наһаа үөрэбин. Онон, “Бичик” тэрилтэтигэр махталым муҥура суох уонна өссө төгүл бүгүҥҥү үөрүүлээх күҥҥүтүнэн, саҥа маҕаһыын арыллыбытынан ис сүрэхпиттэн эҕэрдэлиибин!
Надежда Егорова-Намылы, “Саха сирэ” хаһыат суруналыыһа, суруйааччы:
—Мин куорат таһыгар олорор нэһилиэнньэни кытары күн аайы кэриэтэ көрсөбүн, айаҥҥа алтыһабын. Биирдэ Хатаска айаннаан истэхпинэ, икки киһи кэпсэтэрин истэн соһуйан турардаахпын. “Бу нэдиэлэтээҕи хаһыаттарбын куораттан атыылаһаары уонна саҥа тахсыбыт кинигэлэри көрөөрү айаннаан иһэбин”, — диэн биирдэрэ кэпсии-кэпсии үөрэн мичийэ олороро. Онуоха мин: “Бэл, бу Хатас курдук чугас сиргэ хаһыат тиийбэт буоллаҕына, атын ыраах нэһилиэктэр дьонноро хаһыат, кинигэ диэни олох да умуннахтара. Дьиҥэр, дьон ааҕарга тардыһыыта күүстээх да эбит!” — диэн үөрэ санаабыттааҕым. Онон, нэһилиэнньэ кыһалҕатын билэр, кинилэр тустарыгар ис сүрэхтэн кыһаллан үлэлиир “Бичиктэр” чопчу бу Автовокзалга бүтүн маҕаһыын арыйбыттарыгар олус үөрдүм. Манна саха дьоно элбэхтик сылдьар. Билигин сылдьа үөрэннэхтэринэ, “Бичиктэн” кинигэ кыбыныылаах тахсыбыт дьону элбэхтик көрүөхпүт диэн эрэнэбин. Манна даҕатан эттэххэ, Автовокзал дьиэтэ уруккута буолбатах. Үлэһиттэр сотору-сотору сууйа-сото сылдьаллар, мэлдьи ыраас, сырдык.
Дьэ ити курдук, кэлбит ыалдьыттарбыт, ааптардарбыт бары “Бичиктэргэ” үөрэн-көтөн туран бэйэлэрин алгыстаах санааларын тиэрпиттэрэ биһиги сүргэбитин өссө көтөхтө. Саамай үөрүүлээҕэ диэн, маҕаһыын арыллаатын кытта тута бастакы ыалдьаттарбыт сөбүлүүр кинигэлэрин атыылаһан тутатына илиилэригэр “Бичик” аатыттан бэлэх туттулар.
Күндү ааҕааччыларбытын “Бичик” саҥа маҕаһыыныгар барыгытын күүтэбит!
“Саха сирэ”, edersaas.ru сайтка анаан
Наталья ПРОТОПОПОВА, “Бичик” кинигэ кыһатын PR-менеджерэ.