Арассыыйаҕа идэлээх күнү бэлиэтиир үтүө үгэс баар. Бүгүн, ыам ыйын 27 күнүгэр, кэрэни тарҕатааччы, билиигэ уһуйааччы бибилэтиэкэр күнүн бэлиэтиибит.
Бүгүн Таатта улууһун киин бибилэтиэкэтин информационнай ресурсатын салаатын сүрүннүүр бибилэтиэкэрэ Софида Климова улууска ыытыллар онлайн тэрээһиннэр туһунан сырдатта:
— Коронавирус дьаҥа турбатаҕа буоллар, ааҕааччыларбытын түмэн үгүс тэрээһини ыытыа эбиппит. Ол эрээри, билигин социальнай ситим күүстээхтик сайдыбыт кэмигэр, ааҕааччыларбытыгар онлайн-тэрээһиннэри бэлэмнээтибит.
Онон бу күн улууспутугар «Өй-санаа биһигэ» диэн дьон өйүн тургутар викторина, олохтоох ааҕааччы Александра Грязнухина-Хойутаана «Ньургуһуннар» кинигэтин билиһиннэрии, виртуальнай кинигэ быыстапката, ону сэргэ, «Кинигэ күүһэ» тэрээһини онтон да элбэҕи бэлэмнээтибит.
«Оҕону кинигэнэн уһуйуу» диэн өрөспүүбүлүкэтээҕи аахсыйа эмиэ онлайн нуорманан ыытыллыаҕа.
Бэлиэтээн суруйдахха, бибилэтиэкэ идэтэ чахчы бар дьоҥҥо билиини, кэрэни тарҕатар үтүө идэ. Кэлиҥҥи кэмҥэ бу идэҕэ үөрэнэр ыччат элбиирэ үөрдэр. Кинигэ баар — бараммат баай диэн өс хоһоон чахчы да оруннаах.
Ульяна Захарова, edersaas.ru