Таатта улууһугар Ытык Күөл киин бибилэтиэкэтэ «Кинигэни дьиэҕэ тиэрдии» диэн өҥөнү оҥорор саҥа бырайыагын саҕалаата.
Нэһилиэк дьоно-сэргэтэ бибилэтиэкэ эмиэ биир маннык сонун ньыматын биһирээбитин, сэргээбитин истэн, ааҕааччыны кытта үлэлиир салаа кылаабынай бибилэтиэкэригэр Сардаана Кычкинаҕа эрийэн кэпсэттим.
—Ааҕааччыларбытын өссө элбэтээри, болҕомтолорун сонун хайысханан күүскэ тардаары 70-н үөһээ саастаах кырдьаҕастарга, доруобуйаларынан хааччахтаах дьоҥҥо уонна кыра оҕолорун көрөн олорор ийэлэргэ анаан, кинилэргэ кыра да буоллар өйөбүл, көмө буолаары бу курдук, өҥөнү босхо оҥорор бырайыакпытын саҥа саҕалаатыбыт. Дьиэлэригэр олорон төлөпүөнүнэн сайаапкаланаллар. Ааҕааччы толору аата-суола, аадырыһа бэлиэтэнэр. Ханнык кинигэни ааҕыахтарын баҕаралларын үлэһэллэр. Нэдиэлэҕэ биирдэ, анал күн, үлэспит кинигэлэрин аадырыстарыгар илдьэн биэрэбит, — диэн кэпсээтэ.
Сардаана Трифоновна бибилэтиэкэлэригэр сылга 800-тэн тахса ааҕааччы сылдьарын, эдэр ыччат уонна оскуола үрдүкү кылааһын үөрэнээччитин ахсаана кэнники сылларга биллэ эбиллэн эрэрин этэр. Ааҕааччылары сонурҕатаары тэрийбит «Мин тэрилтэм — мин киэн туттуум» бырайыактарыгар нэһилиэк тэрилтэлэрин сырдатыы үлэтэ күүскэ ыытылларын, тустаах тэрилтэҕэ тиийэн кинигэни уларсыы тэриллэрин, тэрилтэлэр кинигэ быыстапкатын оҥороллорун кэпсиир. «Дьыллар уонна дьоннор» бырайыак ахтыы киэһэтин курдук истиҥник ыытылларын, манна эдэриттэн кырдьаҕаһыгар тиийэ кытталлара кэрэхсэнэрин, урукку кэмҥэ үлэлээбит дьон сэһэргииллэрин ыччат болҕойон истэрин, ыйытыы биэрэрин, онон бу киэһэлэрэ кэрэхсэнэрин бэлиэтиир. «Мин дьарыгым—мин баайым» бырайыакка ураты дьарыктаахтар, кэллиэксийэлээх дьон бэртээхэй быыстапкалары, атах тэпсэн олорон сэһэргэһиилэри тэрийэллэрин нэһилиэк олохтоохторо олус күүтэр буолбуттар. «Доруобуйаҥ — бэйэҥ илиигэр» бырайыакка балыыһалары кытары ыкса ситимнээх үлэлииллэрэ кэрэхсэммит. «Көрсүһүүгэ чуо биир тиэмэ ылыллар. Мэдиссиинэ эйгэтин үлэһиттэрэ мустубут дьону кытары көрсөн олорон сэһэргэһэллэр, ыйытыыларга хоруйдууллар. Ону сэргэ, ити күн босхо анаалыс ылаллар, ЭКГ оҥороллор, хааннарын баттааһынын бэрэбиэркэлииллэр, сүбэ-ама биэрэллэр», — диэн бу бырайыак туһунан сырдатар. «Сэһэн-сэппэн» бырайыакка интэриэһинэй дьоннуун көрсүһүү, тыҥаан турар тиэмэ тула аһаҕас кэпсэтии, санааны үллэстии, маныаха ким баҕалаах барыта кыттара бэртээхэй түһүлгэнэн буолбут. Бибилэтиэкэлэр мантан да атын бырайыактары толкуйдаан олоххо киллэрэн иһэр баҕалаахтар.
Сардаана БАСНАЕВА, «Саха сирэ» хаһыат, edersaas.ru