«Русской души – святая краса» ырыа, үҥкүү бэртээхэй кэнсиэрэ буолла. Киһи дууһатын манньытар, долгутар сэргэх тэрээһиҥҥэ ытык кырдьаҕастары анаан ыҥырдылар. Бу туһунан А.Е.Кулаковскай аатынан норуоттар доҕордоһууларын дьиэтин пресс-сулууспата иһитиннэрэр.
—Кырдьаҕас киһи кыраттан үөрэр. Кини истиҥ кэпсэтиигэ олус наадыйар. Итини учуоттаан, биһиги тэрээһиннэрбитигэр аҕам саастаахтары ыҥыран ыалдьыттатар үгэстээхпит. «Русской души – святая краса» кэнсиэргэ саалаҕа куоракка олорор саастаах дьон муһуннулар. Ону сэргэ, Улуу Кыайыы 75 сылын көрсө өрөспүүбүлүкэтээҕи кырдьаҕастар дьиэлэриттэн тыыл, үлэ бэтэрээннэрэ, сэрии сылларын оҕолоро ыҥырыллан ыалдьыттаатылар. «Бэтэрээннэргэ кыһамньы» социальнай аахсыйаны тэрийээччилэр — СӨ киһи быраабын боломуочунайа Сардаана Гурьева, РФ ИДьМ тырааныспарга Хотугулуу-Илиҥҥи линейнай управлениетын уопсастыбаннай сэбиэтин бэрэссэдээтэлэ Юрий Припузов уонна өрөспүүбүлүкэтээҕи кырдьаҕастар уонна инбэлииттэр интэринээт-дьиэлэрин дириэктэрин солбуйааччы Роза Олесова эҕэрдэлэрин тиэртилэр.
«Русской души – святая краса» кэнсиэр ааптара Ирина Егорова санаатын үллэһиннэ:
—Бырайыакка дьон-сэргэ биһирэбилин ылбыт ансаамбыллар : «Сюрприз», «Ярилов день» үҥкүү народнай ансаамбыллара, «Русь» ырыа ансаамбыла кытыннылар. Ону сэргэ, «Русь» ансаамбыл ырыаһыта Надежда Сахно уонна биһиги истиҥ доҕотторбут Василий Старостин салайааччылаах «Өрөгөй» үҥкүү ансаамбылын уолаттара кыттан, тэрээһиммитин ситэрэн-хоторон биэрдилэр. Норуоттар тэтимнээх бэртээхэй үҥкүүлэрэ толорулуннулар, частушкалар, норуот ырыалара дьиэрэйдилэр. Кэнсиэри норуоттар доҕордоһууларын дьиэтин национальнай култуураҕа Киинин исписэлииһэ Марина Павлова иилээн-саҕалаан наһаа сэргэхтик, ис сүрэҕиттэн олус үчүгэйдик ыытта. Хас биирдии нүөмэр ытыс тыаһынан доҕуһуолланна, — диэн кэпсээтэ.
Кэнсиэр биир тыынынан олус сэргэхтик, үрдүк таһымнаахтык барда. Артыыстар көстүүмнэрэ бииртэн-биир сонун, чаҕылхай. Оттон көрөөччүлэр бука бары үөрэн мичилийэ олордулар, ытыстарын тыаһын харыстаабатылар. Ыҥырыылаах ыалдьыттар — ытык кырдьаҕастар: «Бэртээхэй кэнсиэргэ сырыттыбыт. Махтал», — диэн ис сүрэхтэриттэн этиилэрэ, үөрүүлэрин үллэстиилэрэ бу киэһээҥҥи тэрээһин кыттыылаахтарыгар үрдүк сыанабылынан буолла.
Тэрээһин түмүгэр, үөрүүттэн үөрүүнү үксэтэн, кырдьаҕастар интэринээт-дьиэлэриттэн кэнсиэргэ кэлэн сылдьыбыт аҕам саастаахтарга өйдүү-саныы сылдьалларыгар бэлэхтэр туттарылыннылар.
Айталина АРГУНОВА хаартыскаларга түһэриитэ.