Польша Валбжих куоратыгар бэтэрээн спортсменнар көҥүл тустууга аан дойдутааҕы күрэхтэһиилэрэ ыытыллан түмүктэннэ. Күрэхтэһиигэ 40 дойдуттан 300-чэкэ бөҕөс күөн көрүстэ. Кинилэр ортолоругар Европа, аан дойду чөмпүйэнээттэрин, Олимпийскай оонньуу кыайыылаахтара уонна призердара бааллар. Арай, өрүү элбэх кыттааччылаах ираннар быйыл тоҕо эрэ кэлбэтэхтэр.
Хамаанданан түмүккэ 6 кыһыл көмүс, 3 үрүҥ көмүс уонна 9 боруонса мэтээллээх, Ваник Маргарян тренердээх Россия бөҕөстөрө бастакы миэстэни ыллылар. Ол курдук, Семен Соркомов (59 кг, В), Мартин Арутинян (63 кг, В), Закий Бикбулатов (69 кг, Е), Зураб Касрадзе (130 кг, Е), Василий Алексеев (58 кг, Ф), Ефрем Ефремов (63 кг, Ф) – пьедестал үрдүк үктэлигэр таҕыстылар. Иккис миэстэни Ибрагим Ибрагимов (76 кг, Е), Анатолий Кара-Сал (63 кг, Ф) уонна Федот Соловьев (58 кг, Г) ыллылар. Оттон Саидмагомед Масиев (58 кг,С), Дмитрий Чаҕаан уонна Иван Моисеев (иккиэн 58 кг, Е), Степан Никифоров уонна Валентин Константинов (иккиэн 63 кг, Е), Сергей Мальцев (63 кг, Ф), Муса Дадберов (76 кг, Ф), Василий Пахомов (58 кг, Г) – үһүс миэстэлэргэ тигистилэр.
Көрөргүт курдук, Россия хамаандата барыта 18 мэтээллээх. Итинтэн, этэргэ дылы, хайа охсубут аҥарын сахалар ситистилэр. Үс чөмпүйүөн, алта призер.
Биллэн турар, бэйэбинэн охсон эттэхпинэ, бөҕөстөрбүт кимнээҕи кытта хайдах туһуннулар диэн ыйытыы ааҕааччылары интэриэһиргэтэр буолуохтаах. Ону кылгастык билиһиннэрдэххэ, Семен Соркомов – Монголия, Япония, АХШ, Турция курдук улахан тустуулаах дойдулар бөҕөстөрүн илиилээх-атахтаах оҥортообото. Быһаарыылаах хапсыһыыга Эрсин Басары (Турция) кыл түгэнэ 10:0 ахсаанынан элэҥнэтэн кэбиһэн, бэтэрээннэргэ аан дойду икки төгүллээх чөмпүйүөнүнэн буолла.
Бэйэтин кэмигэр улаханнык туста сылдьыбыт, Россияҕа чөмпүйүөннээбит Василий Алексеев бу сырыыга дьэ табыллан туһунна. Кини бэйэтин киһитэ Валерий Скурихины 10:0, 1985 сыллаахха Василий Гоголев кэнниттэн Европа чөмпүйэнээтигэр иккис буола сылдьыбыт поляк В.Олейнигы ыраастык уонна финалга венгр М.Мартаны 12:0 ахсаанынан эрэллээхтик кыайталаата. Итинэн Василий Николаевич, бэтэрээннэргэ аан дойду чөмпүйэнээтин толору кавалерынан буолла.
Ефрем Ефремов былырыын маннык күрэхтэһиигэ бастаабыта. Ол аатын-суолун чиэстээхтик көмүскээтэ. Кини билигин Турцияттан Косукоглу диэн араспаанньанан кыттар уруккута Европа икки төгүллээх чөмпүйүөнэ, аан дойду үс төгүллээх призера Исмаил Юсейновы 3:1 ахсаанынан хотто. Салгыы американец Л.Баркманы ыраастык уонна финалга, 80-с сыллар ортолоругар Дьокуускайга Бүтүн Сойуустааҕы турнирга кэлэн 57 кг бастыы сылдьыбыт тувинец А.Кара-Саалы 2:1 кыайда.
Бу даҕаны кэрэһилиир, саха тустууга оскуолата инники күөҥҥэ сылдьарын, сахалар хайа даҕаны саастарыгар ситиһиилээхтик тустар үөрүйэхтээхтэрин. Быйыл, өрөспүүбүлүкэҕэ тустуу сайдыбыта 60 сыллаах үбүлүөйдээх сылыгар тустууктарбыт саастарынан араас бөлөхтөргө Россия, Европа, аан дойду чөмпүйүөннэринэн буоллулар. Өссө Виктор Рассадин уонна Виктор Степанов табылыннаҕына, устудьуоннарга аан дойду чөмпүйэнээтигэр Россия чиэһин көмүскүү барыахтаахтар. Манна сыһыары тутан эттэххэ, биир сибиэһэй сонунунан, ХИФУ устудьуона Тимур Николаев (70 кг) Индияҕа ыытыллыбыт норуоттар икки ардыларынааҕы турнирга бастааһына буолар.
Петр ПАВЛОВ