Атырдьах ыйын 5 күнүнээҕи туругунан, Авиалесоохрана чахчыларынан, өрөспүүбүлүкэҕэ 919696 га иэннээх сир умайар. Уопсайа 101 ойуур баһаара баара бэлиэтэннэ. Уоту кытары «охсуһууга» 920 киһи, 96 тиэхиньикэ үлэлииллэр.
Бу күннэргэ Ньурба уонна Сунтаар улуустарыгар СӨ Бырабыыталыстыбатын биэдэмистибэлэр икки ардыларынааҕы оробуочай бөлөҕө үлэлиир. Бөлөҕү премьер-миниистир Владимир Солодов салайар.
Өрөбүл күннэргэ үгүс сиринэн ардахтаан, ойуур баһаардарын ахсаана арыый да аҕыйаата. Чугастааҕы күннэргэ өрөспүүбүлүкэ соҕуруу, соҕуруулуу-илин оройуоннарыгар сөҥүү түһэрэ күүтүллэр.
ЫБММ салаатынан кэлбит икки Бе-200 сөмөлүөтүнэн сууккаҕа 167,5 туонна ууну, Сунтаар уонна Уус Алдан улуустарыгар быраҕан, ойуур баһаардарын умулларыыга төһүү күүһүнэн буолла. Икки Ми-8 бөртөлүөт билигин Баатаҕайга уонна Сунтаарга үлэлиир.
Ураты болҕомто Алдан, Дьааҥы, Ленскэй, Эдьигээн, Өлүөхүмэ улуустарыгар ууруллар. Манна уопсайа 542,9 га иэннээх сир умайар.
Санатан эттэххэ, Ил Дархан Айсен Николаев ыйааҕынан атырдьах ыйын 1 күнүттэн Саха Өрөспүүбүлүкэтигэр ыксаллаах быһыы-майгы эрэсиимэ биллэриллибитэ.