Сааһыран да олордорбун, маннык санаабын тиэрдиэхпин баҕарабын. Туох эмэ уларыйыы тахсыа диэн эрэл санааттан. Биһиги кыргыттарбыт, уолаттарбыт наһаа да кыраһыабайдар, дьоҕурдаахтар. Оттон бүрүчүөскэлэрэ… Үчүгэй уһун да, кылгас да баттахтаахтар хаарыан үчүгэй сирэйдэрин аҥаарын саба сылдьар. Былыргыттан быйылгыга диэри сахалар баттахтарын ыһан баран сылдьыбаттар этэ. Олох былыр хайаан даҕаны өрүнэ уонна хомуна сылдьаллара.
Холобур, ити “Үрдэл” диэн күрэскэ баттахтарын ыһан, былаачыйаларын өттүктэригэр диэри тыраҕастаах оҥорон кэтэллэрэ сахаларга майгыннаабат, көрөрөгө олус сүөргү. Билиҥҥи ыччаттар биһиги курдук тиийиммэт-түгэммэт диэн тугун билбэккэ олордуннар, бэйэлэригэр сөп түбэһэр таҥаһы-сабы эрэ таҥна сырыттыннар диэн баҕалаахпын. Уонна бэйэлэрин сахалыы итэҕэллэрин тута сырыттыннар.
Баҕар, наһаа былыргылыы толкуйдуурум буолуоҕа. Мин 1936 сыллааҕы төрүөх буолабын, онон сэрии бириэмэтин, аас-туор олоҕун олус үчүгэйдик өйдүүбүн. Оччолорго мыыла да көстүбэт буолан, олус кирдээх да сырыттарбыт, таҥас сыыһынан да буоллар, баттахпыт дуомун өрүнэ эрэ сылдьар буоларбыт. Аньыы даҕаны, бэйэбит төбөбүтүн хомуммат оҕо буолуохпут дуо, диэн буолара.
Аны уолаттар сорохторо эмиэ солуута суох бүрүчүөскэлээхтэр. Мин итини барытын тэлэбиисэринэн эрэ көрөбүн. Уонна сорохторуттан хомойо саныыбын. Үчүгэй баҕайы саха оҕолоро ол-бу омуктары үтүктэ сатыыллар.
Бранцузке Тимофеева,
Амма, Абаҕа сэлиэнньэтэ.
Хаартыска: top68.ru