Биһиги, былыргы сэбиэскэйдии иитиилээх дьон, туох сурулларын барытын ыраас манньыакка ылынарбыт өтөрүнэн-наарынан ааспат эбит ээ. Ити ыалым Баһылай Бэттиирэп батсаапка туох кэлэрин барытын көтүппэккэ ааҕар уонна бүүс бүтүннүүтүн итэҕэйэр. Кэпсээнэ эрэ ол. Хата кини иллэҥэ!
Урут кирииптэ балыыта туһунан кэпсиирэ. Аан дойдуга эргииргэ сылдьар саамай эрэллээх харчы ол үһү. Кыахтааҕа буоллар, сибилигин даҕаны тиийэн ол кирииптэлэрин баран баһан ылыах курдук туттара. Дьэ сахалыы да санаан көрдөххө, кирииптэ балыыта – балыыҥка балыыта буолуо ээ.
Былырыын Кээсбэри туһунан кэпсээн кэҕийэрэ, укпут харчыҥ хас эмит төгүл үрдээн төннөр, ол аата син биир бааҥҥа курдук бырыһыан биэрэ сытар үһү, өссө бу куоракка олорор оннук-оннук дьон ол харчытынан ипэтиэкэлэрин саппыттар, соҕуруу баран дьаарбайан кэлбиттэр үһү диирэ.
— Улуу дойду улаҕалаах өйдөөхтөрө биһигинньик акаарылары албыннаан аһыыр албастара! Бу кириисис саҕана кыра омук хараҕыттан харчы ыган ылаары эҥин араас албаһы толкуйдаан эрдэхтэрэ, — диэбитим онно мин.
Кырдьык, саҥам дорҕооно сүтэ илигинэ, били Кээсбэри эстибит сураҕа иһиллибитэ, дьон бөҕөтө укпут харчытыттан мэлийэн ытаабыта…
Ити эрээри, сатаан туһаннахха, батсаап туһалаах бөҕө буоллаҕа. Биһиги, биир дьиэҕэ олорор ыаллар, батсаапка уопсай бөлөхтөөхпүт. Араас наадалаах биллэриини, хайа кыбартыыраҕа саахал буолбутун эҥин барытын онно суруйан ыыталлар.
Сайдаммыт идэһэбитин эмиэ батсаабынан булунар буоллубут. Улуустартан биллэрии бөҕөтө кэлэр: күһүн “хортуоппуй атыылыыбыт, аадырыска тиэрдэбит”, баччаларга “эт атыылыыбыт, куоракка киллэрэн биэрэбит”, — диэн. Биир дойдулаахтар бөлөхтөөхпүт: “Чурапчы биллэриилэрэ” диэн. Онно биллэрии бөҕөтө араас нэһилиэктэртэн кэлэллэр. Баҕардаххына, Мырыла убаһатын этин ыл, баҕардаххына – Сылаҥ сылгытын этин атыылас. Онон, мин быйыл да кыстыыр эппин онтон ылынан олоробун. Батсаабы итинник сөбүн көрөн туһаннахха, абыраллаах тэрил диэтэҕиҥ.
Биэтэс Билээхэп