Судаарыстыбаннай уонна муниципальнай өҥөнү оҥорор кииннэр V Бүтүн Арассыыйатааҕы форумнара ааспыт нэдиэлэҕэ Дьокуускай куоракка буолан ааста. Бу улахан тэрээһиҥҥэ дойду 74 эрэгийиэниттэн 400 тахса киһи кытынна.
edersaas.ru
Икки күннээх форумҥа Арассыыйа үрдүнэн Элбэх өҥөнү оҥорор кииннэр (МФЦ) саҥа кэнсиэпсийэлэрин бырайыагын уонна инники сайдыыларын тосхоллорун дьүүллэстилэр. Саҥа кэнсиэпсийэни чөкөтүүгэ 50 тахса эрэгийиэнтэн араас этии киирдэ.
РФ бырабыыталыстыбатын бэрэссэдээтэлин солбуйааччы, РФ бырабыыталыстыбатын аппараатын салайааччы Константин Чуйченко этэринэн, саҥа кэнсиэпсийэҕэ судаарыстыбаннай өҥөнү оҥоруу саҥа таһымҥа тахсыаҕа. Ол курдук, ким ханна олороруттан уонна пропискалааҕыттан тутулуга суох судаарыстыбаннай өҥөнү оҥорторорго Арассыыйа хайа баҕарар муннугар сылдьан чугастааҕы Элбэх хайысхалаах кииҥҥэ киирэн, докумуон толорторор кыах баар буолуо. Аныгы технология күүскэ сайдан, киэҥ далааһыннаах цифровой уларыйыы ыытыллыаҕа. Ол барылы 2020 сыл олунньу 1 күнүгэр диэри РФ бырабыыталыстыбата көрүөхтээх.
Инникитин Элбэх өҥөнү оҥорор кииннэр хайысхаларын кэҥэтэн, аҥаардастыы судаарыстыбаннай уонна муниципальнай өҥөнөн муҥурданыахтара суоҕа. Холобур, өрөспүүбүлүкэҕэ дьиэни-уоту атыылыыр докумуону Элбэх өҥөнү оҥорор кииҥҥэ регистрациялыыллар. Оттон Московскай уонна Воронежскай уобаласка эмиэ ити кииҥҥэ электроннай уонна цифровой илии баттааһыны оҥорторуохха сөп.
Онон дойду үрдүнэн Элбэх өҥөнү оҥорор кииннэр үлэлэрин саҥардан, килийиэн интэриэһин өрө тутарга, нэһилиэнньэни кытта үлэҕэ биир ирдэбили киллэрэргэ, цифровой өҥөнү туттарга биирдиилээн дьоҥҥо көмө оҥорорго болҕомтолорун ууруохтара. Судаарыстыба уонна нэһилиэнньэ сирэй көрсөн олорон араас боппуруостары быһаарар «соҕотох түннүгэ» үлэлиэхтээх. Урукку курдук докумуон эккирэтиитигэр дьон сэттэ уон сэттэ тэрилтэни кэрийиэхтэрэ, уочаракка бириэмэлэрин барыахтара суоҕа.
Ил Дархан Айсен Николаев өрөспүүбүлүкэ уһук кытыы улуустарыгар төһө даҕаны нэһилиэнньэ ахсаана кыратын иһин, аныгы уонна үрдүк хаачыстыбалаах судаарыстыбаннай, муниципальнай өҥөнөн хааччыйыы баар буолуохтааҕын бэлиэтээтэ. Хоту нэһилиэктэр сүүһүнэн килэмиэтир тайаан сыталларын санатан туран, экэниэмикэҕэ, социальнай эйгэҕэ, судаарыстыбаннай уонна муниципальнай салайыыга цифровой уларыйыы киирэригэр өрөспүүбүлүкэ интэриэстээҕин эттэ.
Элбэх өҥөнү оҥорор киин үлэтин түмүгүнэн 2018 сылга СӨ инвестиционнай эйгэ көрдөрүүтүнэн Национальнай рейтинг инники кирбиитигэр 52 миэстэттэн 22 миэстэҕэ өрө таҕыста.
«Элбэх өҥөнү оҥорор киин судаарыстыбаннай былаас уорганнарын үлэтин саҥа таһымҥа таһаарар драйвер, итиэннэ судаарыстыбаннай уонна муниципальнай өҥөнү үрдүк хаачыстыбалаахтык оҥорор киин буолуохтаах», — диэтэ Айсен Николаев.
Форум түмүгэр бастыҥ үлэлээх Элбэх өҥөнү оҥорор кииннэри наҕараадалаатылар. Ол курдук, «МФЦ Бастыҥ бырайыага» түһүмэххэ СӨ Элбэх өҥөнү оҥорор киинин кыайыылааҕынан биллэрэн, РФ бырабыыталыстыбатын Махтал суругун тэрилтэ салайааччытыгар Таисия Батуеваҕа туттардылар. Эмиэ итинник бастыҥ бырайыак ахсааныгар Московскай, Ростовскай, Липецкэй уобалас киирдилэр.
«Бастакы категориялаах бастыҥ МФЦ» Липецкэй куорат 1 №-дээх салаатыгар, Московскай уобалас Мытищи куорат уокуругар, ону таһынан, Калининград куоракка тигистэ.
«Иккис категориялаах бастыҥ МФЦ» үрдүк ааты Ростов на Дону Кировскай оройуона, Иркутскай уобалас Усть-Ордынскай бөһүөлэгэ, Воронежскай уобалас Рамонь бөһүөлэгэ, Кабардино-Балкарскай өрөспүүбүлүкэ Лескенскэй оройуона үллэһиннилэр.
«Информатизацияны киллэрэргэ бастыҥ холобур» түһүмэххэ Воронежскай, Ростовскай, Липецкэй уобалас ааттаннылар. Маны таһынан, «МФЦ элбэх хайысхалаах үлэтин оҥорор бастыҥ үлэһит» түһүмэххэ Арассыыйа араас куораттарыттан биирдиилээн дьону Махтал суруктарынан бэлиэтээтилэр.
Яна Байгожаева, «Саха сирэ», edersaas.ru