Арассыыйаҕа алтынньы 31 күнүгэр диэри барыллаан биэрэпистиэхтэрэ. Кылгас кэм иһигэр дааннайдара ааҕылла охсон, түмүгэ 2019 сыл саҥатыгар номнуо биллиэҕэ.
Бу 2020 сыллаахха ыытыллыахтаах Бүтүн Арассыыйатааҕы нэһилиэнньэ биэрэпиһигэр бэлэмнэнии курдук буолар. Биэрэпиһи ыытыыга саҥаны киллэриилэр баар буолуохтара, онон бу барыллаан биэрэпискэ ону туһанан көрүөхтэрэ.
Сүрүн уларыйыылар сибидиэнньэлэри хомуйуу схематыгар сыһыаннаахтар. Статистика историятыгар аан бастаан нэһилиэнньэ туһунан статистическай информацияны хомуйуу саҥа ньыматын туһаныахтара. Ол курдук, гражданнар бэйэлэрэ Судаарыстыбаннай өҥө кэлим порталыгар (gosuslugi.ru) биэрэпис лиистэрин толоруохтара.
Ону тэҥэ, биэрэпиһи хомуйааччылар аан бастаан планшетнай көмпүүтэри, смартфоннары туһанар кыахтаахтар.
2018 сыллаах барыллаан биэрэпис икки түһүмэҕинэн ыытыллыаҕа. Бастакыта – Бүтүн Арассыыйа үрдүнэн, иккиһэ – РФ тоҕус эрэгийиэнигэр уон муниципальнай тэриллиини таарыйыа.
Алтынньы 1-10 күннэригэр Арассыыйа ханнык баҕарар олохтооҕо Gosuslugi.ru порталга регистрациялаах буоллаҕына, электроннай биэрэпис лииһин бэйэтэ толоруон сөп. Онон нэһилиэнньэ төһө көхтөөхтүк кыттыбытын, портал көмөтүнэн олус түргэнник ааҕан-суоттаан, сэтинньи-ахсынньы ыйдарга дааннайдар номнуо биллиэхтэрэ.
Алтынньы 16-31 күннэригэр дойду үрдүнэн 10 муниципальнай тэриллиилэргэ биэрэпиһи ыытааччылар кыбартыыраларынан кэрийэ сылдьан, дьону биэрэпистиэхтэрэ. Ону тэҥэ олохтоохтор стационарнай учаастактарга тиийэн, бэйэлэрэ биэрэпискэ кыттар кыахтаахтар.
Ангелина Васильева, «Саха сирэ» хаһыат, edersaas.ru