Мэҥэ-Хаҥаласка нэһилиэктэр социальнай үлэһиттэрин көрүү- куонкуруһа ыытылла турар.
Мэлдьэхси нэһилиэгин Сынньалаҥын киинигэр Сомоҕолоһуу сылынан, “Бары биир санаанан салайтаран” диэн тэрээһин ыытылынна.
Кэлбит ыалдьыттары сахалыы сиэринэн аал уоту аһатан көрүстүлэр — арчылааһын сиэрин-туомун Мэҥэ кыыһа Алгыстаана ыытта. “Далбар” үҥкүү бөлөҕө (салайааччы М.Куприянова) алгыс үҥкүүтүн толордо.
Улуустааҕы социальнай харалта дьиэтин сүрүннүүр исписэлииһэ Мария Федорова улууска КМО-нан көһө сылдьан нэһилиэк социальнай үлэһиттэрин көрүү куонкуруһа ыытылла турарын кэпсээтэ.
Олохтоох салалтаттан Евгений Петров эҕэрдэлээн, тыл эттэ. Куонкуруһу Мария Федорова салайааччылаах, улуустааҕы Инбэлииттэр уопсастыбаларыттан Тамара Пермякова, психологическай сулууспа психолога Алена Калачикова дьүүллээтилэр.
Куонкурус чэрчитинэн Хорообуттан Саргылаана Плотникова, Бэдьимэттэн Саргылаана Андреева, Мэлдьэхситтэн Людмила Шарина, Баатараттан Валентина Попова көрөр дьоннорун илдьэ кэлэн, үлэлэрин сырдаттылар.
Кырдьаҕастар соҕотох хаалан, араас ыарыыга ылларан, дьон көрүүтүгэр киирдэллэр да, санааларын күүһүнэн, хайдах сатанарынан иллэҥ кэмнэрин туһалаахтык атаарарга дьулуһаллар.
Мэлдьэхситтэн 87 саастаах тыыл бэтэрээнэ Екатерина Григорьева мунньубут значок, харчы, бытыылка, хаарты, мыыла, ыйааһын, о.д.а. сувенирдар араастарын элбэх коллекцията, кэмпиэт суутуттан тикпит былааччыйата, түүппүлэтэ, сэлээппэтэ дьон сэргэ сэҥээриитин ылыахтарын ыллылар.
Ыалдьыттар: Сыымахтан социальнай сулууспа бэтэрээнэ Мария Корякина бэйэтин кэмигэр үлэтиттэн ахтыы оҥордо, Мэлдьэхситтэн хоһоон айааччы Акулина Андреева-Иэйилиинэ суруйбут айымньыларын ааҕан иһитиннэрдэ.
Тэрээһини сынньалаҥ киинин дириэктэрэ Мотрена Сыромятникова салайан ыытта.
«Саха сирэ» хаһыат, edersaas.ru сайтыгар анаан Надежда АНДРОСОВА,
Мэлдьэхси.