СӨ Экология миниистирэ Сахамин Афанасьев салалтатынан өрөспүүбүлүкэбит уутугар-хаарыгар балык ыамаларын ыытан үөскэтии, балыгы дэлэтии туһунан сүбэ мунньах буолла.
Кэпсэтиигэ Үөһээ Бүлүү, Ньурба, Сунтаар, Бүлүү, Анаабыр, Өлөөн улуустарын баһылыктара уонна бэрэстэбиитэллэр кытыннылар. Ону сэргэ Росрыболовство ЛТУ , «Главрыбвод» ФГБТ Дьокуускайдааҕы филиала, уо.д.а. кытыннылар.
Сүбэ мунньахха 2021-2024 сылларга Бүлүү өрүскэ балык ыаматын ыытыы каартатын оҥоруу туһунан дьүүллэстилэр. Ону сэргэ, Анаабырга, Өлөөҥҥө сир аннынааҕы баайы туһаныы суотугар балык ыаматын хайдах ыытары, үөскэтэри, дэлэтэри сүбэлэстилэр.
Быйыл атырдьах ыйын бүтүүтүгэр, СӨ Ил Дархана Айсен Николаев кыттыылаах Бүлүү эбэ сүнньүгэр балык ыамаларын ыыттыы үөрүүлээх тэрээһинэ буолбута. Барыта 47 тыһыынча хатыыс ыамата ыытыллыбыта. «Бу тэрээһин Бүлүү сүнньүгэр сытар бары оройуоннарга хатыыс үөскүүрүгэр кыаҕы биэриэ», — диэн Сахамин Миланович бэлиэтиир. Оттон миниистири солбуйааччы Яков Заровняев биэс сыл устатыгар, хас сыл ахсын 15 000-лыы балык ыаматын ыыттахха түмүк көстүөҕүн этэр. Итиниэхэ тулалыыр эйгэни харыстааһыҥҥа муниципальнай бырагырааманан балык ыаматын ыытыы бырайыага олоххо киллэриллэрэ бэлиэтэннэ.
Анаабыр уонна Өлөөн оройуоннарыгар балык ыаматын ыытыы туһунан боппуруоһу дьүүллэһиигэ Яков Заровняев Анаабыр оройуонугар бу боппуруоска СӨ Экология министиэристибэтэ былааны бэс ыйыгар бэлэмнээбитин эттэ. Былааҥҥа «Анаабыр национальнай оройуона» МТ , «ВНИРО» балык хаһаайыстыбатын федеральнай института, Росрыболовство Ленскэйдээҕи территориальнай управление сөбүлэспиттэр. Ол эрээри, науканан үлэҕэ болдьохтон хаалыы баарын, тэрээһиннэри бигэргэтиллибит былаанынан оҥорор ордук буолуоҕун миниистири солбуйааччы ыйда.
Санатан эттэххэ, быйыл кулун тутарга Анаабыр оройуонугар буолбут көһө сылдьар сүбэ мунньахха СӨ Ил Дархана биэрбит сорудаҕынан, улуустарынан балык ыаматын ыытыы үлэтэ салҕанар.
СӨ Экология министиэристибэтин пресс-сулууспата