Бааннар дьоҕус уонна орто биисинэскэ бырыһыана суох кирэдьиит биэриэхтэрэ
Бырабыыталыстыба уонна Киин Баан Арассыыйа бөдөҥ бааннарын кытта холбоһон, дьоҕус уонна орто биисинэскэ бырыһыана суох кирэдьиити биэрэр бырайыагы оҥордулар.
edersaas.ru
Бырайыак бу күннэргэ үлэҕэ киириэхтээх, номнуо Сбербаан уонна ВТБ бааннар бу бырайыак чэрчитинэн үлэлээн эрэллэр. Кирэдьиит бырыһыанын судаарыстыба субсидиятынан сабыллар.
Сбербаан тарҕаппыт суругунан сылыктаатахха, харчыны 2020 сыл алтынньытыгар диэри биэрэллэр эбит. Сайаапка түһэрэр тэрилтэлэр кырата биир сыл үлэлээбит буолуохтаахтар. Кирэдьиит кээмэйэ тэрилтэ үлэһитин ахсааныттан тутулуктаах. Ол курдук, бу көмө дьон хамнаһыгар туттулларга анаан бэриллэр. Ол курдук бэриллэр суума ааҕылларыгар, тэрилтэ үлэһитин ахсаана хамнас алын кээмэйигэр (МРОТ) төгүллэнэр уонна алтаҕа (кирэдьиит бэриллэр ыйдарын ахсаанынан) эбии төгүллэнэр. ВТБ бааҥҥа этэллэринэн, кирэдьиити төһө кыалларынан түргэнник биэрэ сатыахтара.
“Бырагыраамаҕа Арассыыйа бары бааннара кытталлар, кирэдьиити тэрилтэ хамнаһын бырайыагын тутар баан биэрэр”, — диэн быһаардылар Сбербаан үлэһиттэрэ. Сбербаан бырабылыанньатын бэрэссэдээтэлин солбуйааччыта Анатолий Попов этэринэн, бу бырагыраамаҕа уопсайа 130 миллиард солкуобай көрүллэрэ күүтүллэр. Ол иһигэр Сбербаан 5 миллиард кэриҥэ үбү кирэдьиит биэрэрэ сабаҕаланар.Кирэдьиити бааҥҥа кэлиитэ суох, электроннай ньыманан эрдэ сөбүлэммит сайыам курдук ылыахха сөп буолуо.
ВТБ дьоҕус уонна орто биисинэһи өйүүр сыалтан эрдэ 10 сыл иһинэн бэриллибит кирэдьииттэрин реструктуризациялыыр бырагырааманы саҕалаата. Кирэдьиити билиҥҥи сүрүн иэс төлөбүрүгэр эбэтэр бырыһыаннары, хамыыһыйаны төлүүргэ ыытыахха сөп буолуо.
Бэлэмнээтэ Егор Карпов, edersaas.ru