Баан каартатынан түөкүннээһин элбээтэ

Ааптар: 
Бөлөххө киир:

Баан каартатынан түөкүннээһиҥҥэ үксүн кырдьаҕас дьон түбэһэр диэн санаа дьон ортотугар улаханнык тарҕаммыт. Ол эрээри  полиция статистикатын  көрдөххө, олох атын хартыына арыллан кэлэр. Ол курдук, 2020 сыл маҥнайгы кыбаарталыгар “информационнай-телекоммуникационнай технологиялар көмөлөрүнэн буруйу оҥоруу” (ст.ст. 158, 159 УК РФ) ыстатыйатыгар сөп түбэһэр түөкүннээһинтэн биһиги өрөспүүбүлүкэбитигэр 505 киһи эмсэҕэлээбитэ билиннэ.

edersaas.ru

Олор истэригэр:

Дьахталлар – 267
Эр дьон – 238

Саастара:
18-тан 29-гар диэри саастаах – 21%;
30-тан 49-гар диэри саастаах – 46%;
50-тан 59-гар диэри саастаах – 17%;
60-гар диэри саастаах – 16%.

Онон, “кырдьаҕастары эрэ албынныылар” диэн санаа сымыйа буолан тахсар, албыннаппыт дьон үгүстэрэ үлэлиир, орто саастаах дьоннор.

Ааспыт түөрт ый иһигэр ордук элбэх түөкүннээһин түбэлтэтэ Дьокуускай куоракка бэлиэтэммит — 278 түгэн. Маннык буруйу оҥоруу Мииринэй (49), Нерюнгри (47), Ленскэй (25) оройуоннарыгар ордук элбэхтэ бэлиэтэммит. Атын да оройуоннарга каартанан түөкүннээһин күннэтэ элбии турар. Ол курдук Бүлүү улууһугар 12, Мэҥэ Хаҥаласка 10, Өлүөхүмэҕэ 10, Хаҥаласка 9, Үөһээ Бүлүүгэ 8 маннык албыннааһын түбэлтэлэрэ бэлиэтэммитттэр.

Баан каартатынан түөкүннээһин ньымалара күн аайы уларыйа турар. Ол эрэн сүрүн харыстанар ньымалар урукку  курдук судургулар:

— Баан үлэһиттэрэ хаһан даҕаны эһиги дааннайдаргытын көрдөөн сурук суруйбаттар, эрийбэттэр. Итинникэ майгынныыр дьайыыга түбэстэххитинэ тутатына сэрэхэчийиэх тустааххыт;

Баан үлэһитэ эһигиттэн ааккытын суолгутун уонна туһааннаах кэмҥэ эрдэ айыллыбыт хонтуруоллуур тылгытын эрэ ыйытыан сөп;

— Каартаҕыт ПИН-кодун ким даҕаны — баан да үлэһитэ, быраабы араҥаччылыыр уорганнар үлэһиттэрэ даҕаны көрдүүр бырааптара суох!

— «Баантан” эрийэн реквизиттаргытын, пин-кодкутун уонна да атын дааннайдаргытын ыйыта сатаатахтарына тутатына кэпсэтиини тохтотон баран, бэйэҕит бааҥҥытыгар эрийиҥ (баан нүөмэрэ каартаҕыт кэннитигэр сурулла сылдьар).

— Төлөпүөҥҥүтүгэр ким эрэ эрийэн туспа сыһыарыыны туруортара сатыыр буоллаҕына, кэпсэтиини тохтотуҥ уонна бааҥҥа эрийэн тыллааҥ.

Бу кыһалҕа дириҥ соҕус ырытыыны ирдиир, онон сотору “Эдэр Саас” саайт ааҕааччыларыгар толору ыстатыйаны суруйан таһаарыахпыт.

Хаартыска: Za-kon.ru

Егор Карпов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0