Баһаартан эмсэҕэлээбит Чикачевтарга көмө

Бөлөххө киир:

Сэтинньи 9 күнүгэр Сэргэлээх шоссетыгар баар түөрт оҕолоох Чикачевтар саҥа дьиэлэрэ, гаражка турар массыыналара умайан хаалбыта. Бу дьиэни кинилэр хас да сыл устата харчы мунньан, Ийэ хапытаалын туһанан, үс сыллааҕыта туттан киирбиттэрэ. Айыы киһитэ аһыныгас.  “Город Добра» уопсастыбаннай түмсүү уонна «Винил» доброволецтар түмсүүлэрин актыбыыстара бастакы көмөнү оҥордулар.  Сэтинньи 17 күнүгэр аһымал кэнсиэр буолуохтаах.

Баһаар туохтан буолбута биллибэт. Сарсыарда алта чаас саҕана ыал ийэтэ Снежана аһыы буруо сытыттан уһукта биэрбитэ. Кэргэнин, эһэлэрин уһугуннаран, оҕолорун суорҕаҥҥа суулаталаан, нэһиилэ куотан эрэ тахсыбыттара. Ол гынан, турар бэйэлэринэн, туоҕа да суох хаалбыттара. Маллара-саллара, кыһыҥҥы таҥастара, докумуоннара, о.д.а. барыта күл-көмөр буолан хаалбыта.

Баһаар буолбута биллээтин кытта, “ватсабынан” “көмөлөһүҥ” диэн ис хоһоонноох иһитиннэриилэр тарҕаммыттара. Бу оҕолор кылааһынньыктарын төрөппүттэрэ тарҕаппыттар этэ. Дьон кыс ортото туга да суох туран хаалбыт элбэх оҕолоох ыал иэдээнин чугастык ылынан, тута туох кыахтаахтарынан көмөлөһөн барбыттара.

Сэтинньи 10 күнүгэр “Город Добра» уопсастыбаннай түмсүү уонна «Винил» доброволецтар түмсүүлэрэ үөрэнэр тээбириннэри, канцелярскай табаардары, оонньуурдары, таҥас хомуйан, Чикачевтарга биэрбиттэрэ. Кинилэр: “Дьон кыһалҕатыгар болҕомтолоох буолуҥ. Үтүө санаа кыайыахтаах. Ким баҕарар маннык ыарахан түгэҥҥэ түбэһиэн сөп”, — диэн этэллэр. Маны сэргэ куорат тэрилтэлэрэ, холобур, “Айыы кыһата” оскуола харчынан, малынан көмө оҥорбуттара. Дьокуускай куорат Октябрьскай уокуругун управлениета, “Эдэр саас” уопсастыбаннай түмсүү, М.К. Аммосов аатынан ХИФУ уонна “Тулуйхан” студия кыттыһан сэтинньи 17 күнүгэр “Сэргэлээх уоттара” култуура киинигэр аһымал кэнсиэр оҥороллор.

“Махталбыт муҥура суох”

Баһаар буолбутун сарсыныгар  ыйыллыбыт нүөмэринэн эрийэ сылдьыбыппыт. Снежана, төһө да айманан, уолуйан олордор, тулуурдаах саха дьахтарын сиэринэн, куолаһа чиҥ этэ:

— Биир күн иһигэр амарах санаалаах дьон аһынан-таҥаһынан, үөрэх тээбирининэн, харчынан көмө оҥорбуттарыттан соһуйан эрэ хааллыбыт. Бастатан туран, аймахтарбытыгар, доҕотторбутугар, бииргэ үлэлиир дьоммутугар: ОДьКХ ГУП уонна ОДьКХ министиэристибэтигэр, оҕолорбут үөрэнэр 10-с, 5-с №-дээх оскуолаларын учууталларыгар, төрөппүттэригэр, “Ласточка” оҕо саадын иитээччилэригэр, төрөппүттэригэр, бары көмөлөспүт дьоҥҥо барҕа махталбытын хайдах тиэрдиэхпитин билбэппит.

Олох билбэт дьоммут көмөлөһөр баҕалаахтара сөхтөрдө. “Мин дьиэм эмиэ умайа сылдьыбыта, эһиги балаһыанньаҕытын өйдүүбүн” диэн эрийбит киһи, саамай наадалаах малы-салы аҕалбыта. Бу орто дойдуга үтүө санаалаах дьон быдан баһыйар элбэхтэрэ үөрдэр, долгутар…

Билиҥҥи туругунан, кыһыҥҥы таҥаспыт, туттар малбыт баар буолла, ол үрдүнэн аҕала тураллар. Ордор буоллаҕына, эмиэ соторутааҕыта умайбыт дьиэлээх, элбэх оҕолоох ыалга биэриэ этибит…

Чикачевтар билигин төрөппүттэрин дьиэлэригэр бааллар. Билиҥҥитэ дьиэ куортамныыллара дуу, ханна бараллара дуу, биллибэт. Снежана бэһис оҕотун күүтэр, сотору кэминэн төрүүр дьиэҕэ киириэхтээх.

Ангелина ВАСИЛЬЕВА.

Харчынан көмөлөһүөн баҕалаах дьоҥҥо:

Сбербаан счета: 639002769001119976 Чикачева Снежана Алексеевна аатыгар.

8-914-274-2050 төлөпүөнүнэн билсиэххитин сөп.

+1
0
+1
0
+1
0
+1
0
+1
0
+1
0
+1
0