Амма улууһун Бөтүҥ нэһилиэгин ыччата 2016 сыл улуус үрдүнэн Ыччат сылынан биллэриллибитинэн сибээстээн, үтүө дьыаланан дьарыктанарга быһаарыммыттар.
Станислав ИОВЛЕВ, www.edersaas.ru
Бөтүҥ нэһилиэгин ыччатын лидерэ Александр Артемьев эдэр дьону түмэн, уопсай сүбэ мунньах тэрийэн кэпсэтэллэр, сүбэлэһэллэр. Элбэҕи толкуйдуу барбакка, билиҥҥи үлэлии турар уһуйаан дьиэтигэр салҕааһын (пристрой) тутарга быһаарыналлар. Ким биир, сорох уон тутуу маһын биэрэн, матырыйаалларын булуналлар. Бөтүҥ нэһилиэгин баһылыга Саргылана Борисоваҕа үтүө дьыаланан дьарыктанан эрэллэрин иһитиннэрэллэр. Баһылык, биллэн турар, өйүүр. Билиҥҥи туругунан, Бөтүҥ нэһилиэгин саадыгар 110 оҕо сылдьар. Хас даҕаны оҕо миэстэ суох буолан, дьиэҕэ олорор. Уһуйаан икки дьиэлээх.
Салҕааһыннарын тутаары сылдьан билбиттэрэ, сокуонунан биир оҕоҕо 2,5 кв. миэтэрэ эрэ тиксэр эбит. Тутуохтаах салҕааһыннара кыра, син биир миэстэ тиийбэт буолууһу диэн, туспа үһүс дьиэни тутарга күһэллэллэр. Олохтоох дьаһалта, баһылык көмөлөһөн, эдэр дьону өйөөн, сирин тэҥнэттэрэн, үрдэтэн, буор кутарга харчыга үлэһиттэри наймыласпыттар. Билигин тутуу түннүк баайыытыгар тиийэн турар. Тымныы түһэн, үлэ тохтоото. Сааһыары салгыы тутуохтара. Дьиэ кэтитэ — 12 миэтэрэ, уһуна — 17,5 миэтэрэ. Александр Артемьев, Бөтүҥ ыччатын лидерэ этэринэн, билигин 50-ча буруус мас баар. Ол да буоллар, матырыйаал син биир тиийбэт. Эбии булуохтаахтар.
Бөтүҥ нэһилиэгин ыччата бүтүн өрөспүүбүлүкэ үрдүнэн холобур көрдөрдө. Судаарыстыбаттан харчы көрүллүбэтэҕин да үрдүнэн, оҕолорун уһуйааҥҥа сырытыннараары биир сомоҕо күүс буолан, оҕо саадын дьиэтин тута сылдьаллар. Быйыл Ыччат сыла биллэриллибитинэн, бу күһүҥҥээҥҥэ диэри үлэҕэ киллэрэр былааннаахтар.
Станислав ИОВЛЕВ, edersaas.ru