Ситэриилээх былаас отчуота Нам улууһун Бөтүҥэр бэрт көхтөөхтүк барда.
edersaas.ru
Олохтоохтор ситэриилээх былаас отчуотун бырабыыталыстыба оробуочай бөлөҕүн салайааччыта Антонина Винокурова билиһиннэрбитин болҕомтолоохтук истэн баран, тута боппуруостары биэрэн бардылар.
Орто оскуола учуутала, профсойуус бэрэссэдээтэлэ Владимир Бандеров бырайыас харчытын тоҕо эрдэ биэрбэттэрин туоһуласта.
Онуоха СӨ Сыана бэлиитикэтин судаарыстыбаннай кэмитиэтин салайааччы Антонина Винокурова:
— Бырайыаһы туһанааччылар отчуоттарын кэмигэр оҥорон туттарбаттар этэ. Ол иһин туһаныллыбыт айан харчыта анал туоһу докумуоннарга олоҕуран төннөрүллэр, — диэн хоруйдаата.
Москватааҕы судаарыстыбаннай университеты бүтэрбит эдэр ийэ Анна Заровняева оҕотугар олорор кэмигэр эбии үөрэхтээһин чэрчитинэн оҕону сайыннарар устуудьуйа аспыт. Социолог идэлээх ыччат бэйэ дьыалатын арыммыт эрээри, оҕолору биир сиргэ мунньан үлэлииригэр дьиэ көстүбэккэ, арендалыырга күһэллибит. Предпринимательство уонна туризм миниистирин солбуйааччы Максим Прокопьев Намнааҕы Бизнес-инкубатор салайааччытын Алексей Винокуровы кытта бу боппуруоска сүбэлэһиэх буолла. Оттон улуус баһылыга Юрий Слепцов эдэр педагогу киниэхэ приемҥа киирэ сылдьарыгар ыҥырда. Маны таһынан, Анна Заровняева чаҕылхай эрэ ыччаттары кытта үлэ барарын бэлиэтээн туран, олоххо бэйэтин миэстэтин була илик ыччаты кытта туох үлэ барарын интэриэһиргээтэ.
Ону тэҥэ киин куораттарга үөрэммит ыччаттар Саха сиригэр үлэ миэстэтин булбакка, Санкт-Петербурга, Москваҕа төттөрү төннөллөрүн туһунан эттэ. Маныаха эмиэ туох үлэ ыытылларын ыйыталаста. Нам улууһугар ыытыллар отчуокка ыччат миниистирэ Степан Саргыдаев сылдьарынан сибээстээн, Анна бу боппуруоһу сиһилии киниттэн ыйыталаһыаҕа.
Дьахтар сэбиэтин бэрэссэдээтэлэ Анна Евстафьева үүт сыаната үрдүүрүн сураста.
СӨ сыана бэлиитикэтин судаарыстыбаннай кэмитиэтин салайааччы Антонина Винокурова:
— Судаарыстыба үүт сыанатын быһар кыаҕа суох. Оҥорон таһаарар тэрилтэ сыананы быһар. Кэлиҥҥи кэмҥэ киин куоракка бэйэ оҥорон таһаарар бородууксуйата олус элбээбит. Онон конкуренция эмиэ баар. Сыанатын ыараттахха, аны үүт ас атыытыгар охсуон сөп, — диэн быһаарда.
Улуус баһылыга Юрий Слепцов улуус салалтата «Эрэл» потребительскай кэпэрэтииби кытта быһыллыбыт үүт сыанатыгар 5 солк. эбэр туһунан кэпсэтэ сылдьалларын эттэ. Оччотугар үүтү тутуу 50 солк.тиийэ улаатыан сөп эбит.
Биэнсийэлээх Валентин Захаров уматык сыаната тоҕо үрдүү турарын ыйытта.
Улууска ситэриилээх былаас отчуотун ыытар бөлөх салайааччыта Антонина Винокурова бэлиэтээбитинэн, уматык сыанатын 70%-нын бородууксуйаны оҥорон таһаарар собуот быһар.
— «Саханефтегазсбыт» АХ сыллааҕы туттар уматыгы биирдэ атыылаһан ылар. Былырыын ол атыылаһар кэмигэр бородууксуйаны оҥорон таһаарар собуоттар сыаналарын үрдэтэн кэбиспиттэр. Инньэ гынан хампаанньа олус ыарахан сыанаҕа атыылаһан, уматык сыанатын үрдэтэргэ күһэллибит, — диэн быһаарда Антонина Борисовна.
Дьон ыйытыытын ис хоһооно сүрүннээн сэрии оҕолоругар чэпчэтии көрүллүүтүгэр, оскуола оҕотун аһылыгар, нэһилиэк суолун асфаллааһыҥҥа, ыччат дьарыктаах буолуутугар сыһыаннаах буолла. Атын улуустарга суол тутуутун, өрөмүөнүн туруорсар буоллахтарына, бөтүҥнэр суолларын асфаллыыры туруорсаллар. Ол курдук, ситэриилээх былаас отчуотун ыытар 1-кы бөлөх салайааччыта Антонина Винокурова:
— Быйылгыттан Хатырыкка дылы барар асфальт суолу тардыы 2021 сылга диэри үс этаабынан ыытыллыаҕа. Быйыл 9 км асфальт суол оҥоһуллуоҕа, — диэн эппитин истэн олохтоохтор: «Оо, ол аата биһиги Бөтүҥмүтүгэр диэри асфальт суол кэлэр эбит, — диэн үөрүүлээх сонуну ытыстарын таһынан көрүстүлэр.
Бөтүҥ нэһилиэгин олохтоохторо бырабыыталыстыба ааспыт сыллааҕы үлэтин биһирииллэрин биллэрдилэр.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.