Саҥа дьыл саҕана Аллайыаха улууһун саамай ыраах сытар Бөрөлөөх нэһилиэгэр “күөх рейс” тиийэн, олохтоохтор саҥа дьылы үөрэ-көтө, остуол хотойорунан астаах-үөллээх көрүстүлэр.
Ол курдук, бөртөлүөтүнэн тиийбит хортуоппуйу, хаппыыстаны, сымыыты, халбаһыыны, атын оҕуруот аһын бөрөлөөхтөр хамаҕатык атыыластылар. Маны сыа-сым курдук тутан, атыыһыт Полина Спиридоновна Рожина атыылаата. “Хата, бачча тымныылартан иҥнибэккэ, “Күөх рейс” кэллэ”, — диэн үөрүүтүн үллэстэр нэһилиэк актыбыыһа Людмила Колесова.
2019 сыл бүтүүтэ Бөрөлөөхтөөҕү уот ыстаансыйатын 55 сылын киэҥник бэлиэтээтилэр. Манна үбүлүөй үөрүүтүн үллэстэ Чокуурдаахтааҕы ДЭС начаалынньыга, Бөрөлөөхтөн төрүттээх Альберт Местников вездеходунан тиийэн, эҕэрдэлээтэ.
Ити курдук, кытыы, ыраах Бөрөлөөххө ааспыт сыл бэлиэ түгэннэри бэлэхтээтэ. Аны бу үүммүт 2020 сыл этэҥҥэ аастар диэн баҕа санааларын этэллэр олохтоохтор.
Женни Стрюкова
Л.Колесова хаартыскалары биэрдэ
+1
+1
+1
+1
+1
+1
+1