Бүлүү улууһугар коронавируһу утары үлэлиир оперативнай ыстаап кэккэ дьаһаллары ылынна.
edersaas.ru
Ол курдук, бастакы тымныйан ыалдьыы сибикитэ билиннэҕинэ тута улахан дьон 43650, 43660 нүөмэрдэргэ эрийэн, онтон оҕолор 43385 нүөмэргэ оҕо поликлиникатыгар биллэриэхтээхтэр диэн ыйда. Ону тэҥэ омук сирдэриттэн кэлээччилэр 8(800)1001403 нүөмэргэ эрийэн, тустаах ирдэбили тутуһалларыгар эттэ. Бу курдук, анал төлөпүөннэри ыйан туран, дьоҥҥо тиэрдии — үтүө холобур.
Маны таһынан, Бүлүү куоратыгар В.Г. Румянцев аатынан 2 №-дээх Оҕо спортивнай оскуолатыгар, Н.Г. Чернышевскай аатынан Бүлүү педкэллиэһин устудьуоннарын уопсай дьиэтигэр, Кыһыл Сыырга Оҕо айар дьиэтигэр обсерваттары астылар.
Бүлүү улууһунааҕы киин балыыһа үлэһиттэригэр дьаһалта көмөҕө диэн үс массыынаны эбии анаата. Бүлүү улууһуттан Дьокуускай куоракка үөрэнэр үрдүк уонна орто анал үөрэх устудьуоннарын кулун тутар 20-21 күннэригэр оптуобуһунан дьиэлэригэр аҕалыахтара. Ыччаттар 42129 төлөпүөҥҥэ эрийэн билсэхтэрин сөп. Устудьуоннар бастакы бөлөхтөрө — 150 ыччат дойдуларыгар тиийдилэр. Аны иккис бөлөх дойдутугар айанныырын кэтэһэр.
Оройуон бүддьүөтүттэн коронавируһу бопсор үлэни ыытыыга 4 883 338 солк. эбии үбүлээһин көрүллүөҕэ. Бу харчынан эмчиттэр бактерициднай лаампалары, сэбиргэхтэтиигэ туттуллар ыраастыыр суурадаһыннары, мааскалары атыылаһыахтара. Бу туһунан улуустааҕы оперативнай ыстаап @bylyy_uluuha инстаграм сирэйигэр иһитиннэрдэ.
Ыстаап үлэһиттэрэ үлэлэрин түмүгүн күнүнэн таһааран иһэллэрин бэлиэтиир тоҕоостоох.
Елена ПОТОЦКАЯ, «Саха сирэ» хаһыат, edersaas.ru
Хаартыска @bylyy_uluuha инстаграм сирэйиттэн.