Бүлүүлэр алта ыйга харайыллар үрүҥ аһы оҥоруохтара

Ааптар: 
Бөлөххө киир:

Бүлүү улууһугар “Сыа Бүлүү” тыа хаһаайыстыбатын астыыр производственнай кэпэрэтиибэ (бырабылыанньа бэрэссэдээтэлэ Алексей Кондратьев) кэпэрэтиип базатын хаҥатан, үлэтин-хамнаһын кэҥэтэн, тупсаран иһэрин түмүгэр, Бүлүү улууһугар үрүҥ ас төгүрүк сыл устатыгар быстыбат.

edersaas.ru

Атырдьах ыйын 1 күнүнээҕи туругунан, сыл саҕаланыаҕыттан 2 734 туонна үүтү тутан астаата. Кэпэрэтиип 2012 сыллаахха урукку “Бүлүү” агрофирма астыыр собуотун ылан, үрүҥ аһы астааһыны, итиэннэ ыраас ууну кутууну саҕалаабыта. Салгыы Өкүндүгэ механизированнай буойуна туттан, дохуоту эттэн эмиэ ылар буолбута.
Астыыр кэмбинээтин үүтүнэн быспакка хааччыйар сыалтан, хас да сыллааҕыта улуус көмөтүнэн Новосибирскай уобаластан үрдүк бородууксуйаны биэрэр симментал боруода ынахтары аҕалан, “Ампаардаах” диэн хаһаайыстыбаны тэрийбитэ. Билигин “Ампаардаах” Симон Томскай салалтатынан таһаарыылаахтык үлэлиир, өрөспүүбүлүкэҕэ холобурга сылдьар биир бастыҥ үлэлээх хаһаайыстыба буола үүннэ. Ол курдук, 2017 сыллаахха ынаҕын ахсыттан 3600 киилэ үүтү ыабыт буоллаҕына, былырыын 3700 киилэни ыабыта, быйыл бу кирбиитин өсө тупсарар сыаллаах үлэлиир.

“Сыа Бүлүү” кэпэрэтиип быйыл сайыҥҥыттан бородууксуйа харайыллар болдьоҕун уһатарга үлэлэһэ сылдьар. Улуус дьаһалтата (баһылык Сергей Винокуров) бэйэтин бүддьүөтүттэн 11,5 мөлүйүөн солкуобай көрөн, Арассыыйа киин уобалаһыттан алта ыйга харайыллар болдьохтоох бакыаттаах үүтү оҥорор “Парогенератор-стерилизатор” диэн икки тэрили аҕалтарда.
— Икки тэрилтэттэн биирэ гааһынан, атына электричэскэй уотунан үлэлиир, — диэн кэпсиир кэпэрэтиип салайааччыта Алексей Кондратьев. – Гааһынан үлэлир тэрил биһиги кэмбинээппитигэр бэрилиннэ, оттон уотунан үлэлиир стерилизатор өрүс уҥуор, элбэх сүөһүлээх, өлгөм үүтү ыыр Мастаах түөлбэтигэр туруоруллуохтаах. “Парогенератор-стерилизаторы” биһиги бэс ыйыгар аҕалан туруорбуппут, ону собуоттан анал исписэлиис кэлэн, таҥарга көмөлөһөн, хайдах көрөн-истэн үлэлэтэргэ үөрэтэн барда. Аныгы технология этэринэн салайыллар тэрили боруобалаан үлэлэтэн, күлүмүрдэс бакыаттан стерилизацияны ааспыт үүтү амсайдыбыт. Кырдьык, бэйэбит үүппүт амтана бэртээхэй! Үүтү стерилизациялааһын технологията диэн тугун судургу тылынан быһаардахха, пиэрмэлэртэн кэлбит үүт диспергаторы ааһан сууланар, итиэннэ автоклавка угуллан, чаас аҥаарын устата 140 кыраадыска тиийэр итии паарга стерилизацияланар, онтон “муустаах” тымныы уунан сойутуллар.


Билигин “Сыа Бүлүү” үлэһиттэрэ саҥа тэрилинэн оҥорбут бастакы бородууксуйаларын (сыл аҥаара харайыллар үүтү) тустаах хонтуруоллуур уорганнарга анаалыска туттаран, ол түмүгүн кэтэһэллэр. Ону таһынан ирдэниллэр докумуоннары толордулар, декларация оҥортордулар уонна этикиэткэ толкуйдаатылар. Аны үүтү кутар анал бакыаттар кэллэхтэринэ, бу күннэргэ уһуннук харайыллар бородууксуйа оҥоһуутун бырамыысыланнай таһымынан саҕалыахтара. Онуоха үүт сыаната бастаан утаа 90 солкуобайга тэҥнэһиэхтээх, онтон кэпэрэтиип салайааччыта этэринэн, сыаната сыыйа түһүөхтээх.
Дьэ, оччоҕо, Арассыыйаны ааһан, араас тас дойдулартан кэлэр бороһуогунан оҥоһуллубут, соя эбиилээх, уһуннук харайыллар “ультрапастеризованнай” бакыаттаах үүт сотору кэминэн биһиги маҕаһыыннарбытыттан сүттэҕинэ да көҥүлэ. Бэйэлээх бэйэбит үүппүт ордуга, экологическай өттүнэн ырааһа, иҥэмтэлээх эттигинэн баайа биллэр буоллаҕа! Уонча да хонукка холодильникка аһыйбакка турдаҕына, ситиһии буолуон сөп. Онтон астыыр-үөллүүр хаһаайыстыбалар арыынан эрэ муҥурдаммаккалар, уһун кэмҥэ харайыллар болдьохтоох бородууксуйаны оҥорон, сыраны толуйар сыанаҕа батардахтарына, нэһилиэктэргэ үүтү туттарааччы ахсаана элбиэ, ынах сүөһүнү иитиигэ интэриэс биллэрдик улаатан иһиэ этэ.
Ити курдук, Бүлүү улууһугар тыа хаһаайыстыбатын салаатын өйүүргэ, үрүҥ илгэни астаан, саҥа бородууксуйаны оҥорорго, харайарга, батарарга саҥа суоллары тобулаллар.

Бүлүүттэн Николай Куприянов, «Саха сирэ» хаһыат, edersaas.ru. сайтка анаан

+1
0
+1
0
+1
0
+1
0
+1
0
+1
0
+1
0