Бүлүү куоракка Култуура дыбарыаһын тутуу боппуруоһа 2014 сылтан саҕаламмыта. «АЛРОСА» АК үс сыллаах дивиденин үбүнэн култуура дыбарыаһа тутуллар кыахтаах диэн улуус дьаһалтата боппуруос көтөхпүтэ. Онуоха улуустааҕы Сэбиэт сорох дьокутааттара ити үп экологияҕа анаан көрүллэринэн сибээстээн, нэһилиэктэргэ көмөнү аҕалыахтаах диэн санаанан салайтаран, кинилэргэ түҥэтэргэ туруорсубуттара эрээри, ол олоххо киирбэтэҕэ.
2015 сыллаахха от ыйынааҕы сессияҕа улуустааҕы Сэбиэт Култуура дыбарыаһын бырайыагын уонна сметатын оҥорууга 50 мөл. солк биэрэргэ сөбүлэспитэ.
Саҥа эбийиэк 282 мөл. солк суумалааҕа быһаарыллан, бэдэрээтчити быһаарыы аукцион сэтинньигэ биллэриллибитэ. Ити тэрээһиҥҥэ кыттыахтаах тэрилтэлэр киллэриллибэккэлэр, аукцион ыытыллыбатаҕа. Салгыы сакаасчыт «түргэн туттунууну» оҥорон, куонкурсу ыыппакка эрэ уонна хантараакка этиллэр сыана аукцион быһыытынан түһэриллибэккэ, «Легион-ГРК» ХЭУо тутарыгар этиини кэмбиэргэ биэрбитэ. Мантан төрүөттэнэн аукциоҥҥа кыттыбатах тутуу тэрилтэлэрэ Федеральнай Саха сиринээҕи антимонопольнай сулууспаҕа биһигини саа даҕаны тэбиитигэр чугаһаппатылар диэн үҥсүү түһэрбиттэрэ. Онуоха Саха сиринээҕи антимонопольнай сулууспа тутуу куонкурсун ирдэбил быһыытынан ыыталларыгар ыйыы биэрбиттэринэн үрдүнэн, улуус дьаһалтатын өттүттэн ону туоратар үлэлэр ыытыллыбатахтар. Улуус дьаһалтата 50 мөл. солк «Легион-ГРК» ХЭУо счетугар аһардан, быйыл саас, сайын ити үбүнэн Култуура дыбарыаһын сыбаайата түһэриллибитэ.
Саха сиринээҕи антимонопольнай сулууспа дьаһала олоххо киирбэтэҕин иһин, улуус дьаһалтатын суукка биэрбитэ. Суут бэрт уһуннук барбыта эрээри, улуус дьаһалтата сокуоннайа суох дьаһаммыта дакаастаммыта уонна «Легион-ГРК» ХЭУо хантараага дьиҥэ суоҕунан ааҕыллыбыта. Улуус дьаһалтата сокуон ирдэбилин тутуһан, аукциону хат ыытарыгар суут уурааҕа тахсыбыта. Суут быһаарыытынан, «Легион-ГРК» сыбаайаны түһэриигэ туһаныллыбыт 50 мөл. солк төннөрдөҕүнэ эрэ аукцион хаттаан ыытыллар кыахтаах.
«Бүлүү улууһа» МТ аукциоҥҥа хамыыһыйатын бэрэссэдээлэ Андрей Лобашев төлөпүөнүгэр эрийэн ыйыталаспыппытыгар: «Суут уурааҕын кытта сөбүлэспэппитин биллэрэн утары дьыала түһэриэхпит», – диэн эппиэттээтэ.
Маннык утарыта туруу тэрээһиннэрэ ыытыллыбыттарыттан билигин Култуура дыбарыаһын тутуу тохтоон турар. Дьиҥэр, былаан быһыытынан барбыта буоллар, эһиил Олоҥхо ыһыаҕын баттаһа үлэҕэ киириэн сөп этэ.
Иван ВАСИЛЬЕВ.