Бүлүү муостатын тутуу бырайыактааһыныгар судаарыстыбаннай хантараак түһэрсилиннэ
Олунньу 19 күнүгэр “Бүлүү” суолун управлениета Бүлүү өрүһү туоруур муостаны бырайыактааһыҥҥа “Хотьковский мост” ААУо кытары судаарыстыбаннай хантараак түһэристэ.
edersaas.ru
Муоста былаан быһыытынан “Бүлүү” федеральнай суолун 660 км Үөһээ Бүлүү аннынан тутуллуохтаах. Хантараак быһыытынан бэдэрээтчит инженернай чинчийии, муоста бырайыагын үлэлэрин ыытарын таһынан, судаарыстыбаннай экспэртиисэни ыытыахтаах. Судаарыстыбаннай хантараакка илии баттаныллыбытын кэннэ, чинчийэр-бырайыактыыр үлэлэр саҕаланыахтаахтар. Бу үлэ 2021 сыл иккис аҥаарыгар бүтүөхтээҕин туһунан туһааннаах управление пресс-сулууспата иһитиннэрдэ.
“Бүлүү” суолун управлениетын начаалынньыга Николай Андреев: «Массыына туоруур муосталарын тутуу Росавтодор бигэргэппэт былаанын быһыытынан ыытыллар. Былырыын сэтинньигэ Марха өрүһү туоруур муоста үлэҕэ киллэриллиэҕиттэн, биһиги муосталары тутуу саҥа түһүмэҕэр киирэбит. Чугастааҕы сылларга Алдан өрүһү туоруур муостаны бырайыактааһын саҕаланыаҕа”, — диэн иһитиннэрдэ.
ЫСПЫРААПКА: Бүлүү өрүһү туоруур муоста 1,7 килэмиэтир уһуннаах буолуоҕа. Тутуу үлэтэ былаан быһыытынан 2021 сылтан саҕаланыахтаах. Үбэ-харчыта федеральнай бүддьүөттэн көрүллүөхтээх.
edersaas.ru