Бэҕэһээ Владимир Путин дуоһунаһыгар киирээт, тута бырабыыталыстыба бэрэссэдээтэлининэн Дмитрий Медведевы көрөрүн туһунан биллэрбитэ. Дмитрий Анатольевич кандидатуратын бүгүн Госдума дьокутааттара Москва бириэмэтинэн күнүс 15 чааска көрүөхтэрэ.
Госдума бүгүҥҥү мунньаҕын бэбиэскэтигэр биир эрэ боппуруос турар. Ол – РФ бэрэсидьиэнэ премьер-миниистиринэн Дмитрий Медведевы аныыр туһунан киллэрбит этиитин көрүү. Дмитрий Анатольевич бэҕэһээ “Биир ньыгыл Россия”, “ЛДПР” баартыйалары кытары көрсүбүтэ. Бүгүн 11 чаастан “РФКП” уонна “Сиэрдээх Россия” баартыйалар фракцияларын кытары көрсүөхтээх.
Дмитрий Медведев “Биир ньыгыл Россиялары” кытары көрсө олорон, каадыр боппуруостарыгар уларыйыы киириэҕин туһунан санаатын эппитэ. Ол курдук, Счетнай палата салайааччытын Татьяна Голикованы вице-премьер дуоһунаһыгар аныыр сөбүн эттэ. Кини социальнай бэлиитикэ, үлэ-хамнас, биэнсийэ, доруобуйа харыстабылын боппуруостарыгар үлэлэһиэхтээх. Дмитрий Анатольевич бэлиэтииринэн, вице-премьер э.т. Дмитрий Козак промышленноһы, энергетиканы, Алексей Гордеев тыа хаһаайыстыбатын, Ольга Голодец култуураны, спорду, Виталий Мутко тутууну, Максим Акимов тырааныспар, сибээс, цифровой экономика эйгэтин, Юрий Борисов оборонаны салайыахтара. Үп миниистирэ Антон Силуановы бастакы вице-премьер дуоһунаһыгар аныырга эттэ. Оттон бэрэсидьиэн көмөлөһөөччүтүн, РФ бэрэсидьиэнин хонтуруоллуур управлениетын начальнигын Константин Чуйченкону бырабыыталыстыба аппаратын салайааччытынан көрөрүн биллэрдэ.
Владимир Путин Госдума мунньаҕар кэлэн Дмитрий Анатольевиһы бэйэтэ билиһиннэрэрэ күүтүллэр.
Аграфена КУЗЬМИНА, “Саха сирэ” хаһыат.