28 сыл анараа өттүгэр, 1991 сыл атырдьах ыйын 22 күнүгэр, Москваҕа Үрүҥ дьиэ үрдүгэр дойду устуоруйатыгар тосту уларытыыны киллэрбит, саҥа тутулу кэрэһилиир үс өҥнөөх судаарыстыбаннай былааҕа тэлибирэччи ыйаммыта. Бу күнтэн ыла үрүҥ, халлаан күөҕэ уонна кыһыл өҥнөрдөөх былаах гиэрбэни уонна өрөгөй ырыатын кытары Арассыыйа саҥа судаарыстыбаннай бэлиэтинэн буолбута.
edersaas.ru
Устуоруйаттан
Үс өҥнөөх былаах дириҥ силистээх-мутуктаах. Ол курдук, аан бастаан 1667 сыллаахха ыраахтааҕы Алексей Михайлович кэмигэр «Орел» диэн нуучча байыаннай хараабылыгар үс дьүһүннээх былаах күөрэччи ыйаммыта. Онтон Петр I ыраахтааҕы 1705 сыллаахха тохсунньу (20) 31 күнүгэр нуучча бары устар аалларыгар маннык былаахтары ыйыыр туһунан ыйааҕы таһаарбыта.
Суолтата
Арассыыйа судаарыстыбаннай былааҕын хас биирдии өҥө бэйэтэ туспа суолталаах. Ол курдук, маҥан – ыраас санааны, халлаан күөҕэ – чиэһинэй уонна эрэллээх буолууну, кыһыл өҥ – хорсун, эрдээх санааны, итиэннэ Аҕа дойду иһин тохтубут хааны дьүһүйэллэр.
Билинии
Арассыыйа оччотооҕу бэрэсидьиэнэ Борис Ельцин 1994 сыл атырдьах ыйын 20 күнүгэр таһаарбыт ыйааҕынан, атырдьах ыйын 22 күнэ Арассыыйа Федерациятын Судаарыстыбаннай былааҕын күнүнэн олохтоммута. Бу күнтэн ыла хас сыл ахсын Арассыыйаҕа араас таһымнаах тэрээһиннэр, патриотическай аахсыйалар ыытыллаллар.
Биһиги корр., edersaas.ru