Быйылгы уратылаах сыл Кыайыы параата Бүтүн Арассыыйатааҕы «Звон Победы» аахсыйанан саҕаланна.
edersaas.ru
Ийэ дойдуларын көмүскээн, Улуу Кыайыыны уһансыбыт ытык дьоммутун, сэрии кыттыылаахтарын санаан ааһар, барыбыт ытык иэспит буолар.
Горнай улууһун дьаһалтатын баһылыгын социальнай боппуруостарга солбуйааччыта Ксенья Васильева «Автоледи» уопсастыбаннай тэрилтэ актыбыыс дьахталлара ыыппыт тэрээһиннэрин туһунан бу курдук кэпсиир:
— Бу күн «Автоледи» түмсүү салайааччыта Аэлита Андреева тэрээһининэн Кыайыы параатыгар кыттыһан, биир дойдулаахпыт рационализатор Сахаар Павлов бэйэтэ оҥорбут байыаннай тиэхиньикэлэрин дьон көрүүтүгэр таһаарда.
Бэрдьигэстээх киин уулуссаларынан айаннаан иһэн, биир мүнүүтэ устата тимир көлөлөөх кыргыттар массыыналарынан «сигнааллаан» аастылар.
Ити курдук, Аҕа Дойду Улуу сэриитин кыттыылаахтарын санаан, чиэстээн аахсыйаҕа көхтөөхтүк кыттан сэргэх тэрээһини тэрийдилэр.
Елена ПОТОЦКАЯ, «Саха сирэ» хаһыат, edersaas.ru
