АТУРК университеттара Арктика зонатын айылҕатын кэтиир систиэмэни оҥоруохтара
Ааспыт нэдиэлэҕэ ХИФУ баазатыгар Арассыыйа уонна Кытай тиэхиньиичэскэй университеттарын ассоциациятын (АТУРК) Арктиканы чинчийиигэ бастакы форума буолан ааспыта. Форум кыттыылаахтара Арктика айылҕатын эйгэтин туругун кэтээн көрүүгэ уонна мониторинг үлэтин олохтуурга, АТУРК киирэр университеттар кыамталарын туһаныахха диэн этии киллэрдилэр.
edersaas.ru
ХИФУ естественнэй уонна тиэхиньиичэскэй хайысхаларга проректора Анатолий Николаев, Арассыыйа уонна Кытай үөрэхтэрин кыһалара кыттыгас үлэлэһиилэрэ инженернэй боппуруостары быһаарсыыга уонна Арктика айылҕатын харыстааһыҥҥа туһуланыахтаах диэн бэлиэтээтэ. “Биир сүрүн хайысханан Хотугу муора суолун сайыннарыы буолар. Ити туһунан Кытай бэрэсидьиэнэ Си Цзиньпин уонна Арассыыйа бэрэсидьиэнэ Владимир Путин кэпсэтэн тураллар. Хотугу муора суола, тырааныспар чахчы хорук тымырынан буолар. Ол эрээри, инфраструктураны уонна наука чинчийиитин сайыннарбакка эрэ, ити ресурсаларын таба туһанар кыахпыт суоҕун сөпкө өйдүөххэ наада”, — диэн Анатолий Николаев тоһоҕолоон бэлиэтээтэ.
Форум кыттыылаахтара АТУРК университеттарыгар каадырдары бииргэ бэлэмнээһин систиэмэтин олохтуур уонна Арктикаҕа ыытар научнай-чинчийэр уонна инновационнай үлэҕэ үрдүк үөрэхтэр түмсэн үлэлииллэрэ наадатын быһаардылар.
“АТУРК-ка элитнэй федеральнай университеттар, национальнай чинчийэр институттар, инники күөҥҥэ сылдьар үөрэх тэрилтэлэрэ киириэхтэрин сөп. ХИФУ ити университеттар кэккэлэригэр киирэриттэн олус үөрэбит”, — диэн эбэн эттэ.
Тэрээһин кыттыылаахтара иһитиннэрбиттэринэн, АТУРК I форумугар Арассыыйа үрдүк үөрэҕин кыһаларыттан ассоциацияҕа Массыына, суол-иис Сибиирдээҕи судаарыстыбаннай университета итиэннэ Иркутскайдааҕы тиэхиньиичэскэй национальнай чинчийэр университет киирэр санаалаахтарын биллэрбиттэр. Бүгүҥҥү күҥҥэ АТУРК састаабыгар Арассыыйа уонна Кытай 60 элитнэй университета баар. Итинтэн 51 университет ассоциация чилиэнэ, 9 университет кэтээн көрөөччү.
ХИФУ пресс-сулууспата.