Аттаах сэлэлээн хаамтылар (видео)

Бөлөххө киир:

Бүгүн киэһээ Дьокуускай куоракка Ленин болуоссатыгар дьон тоҕуоруһа муһунна. Бу иннинэ уулуссалары саппыттара. Дьон тугу эрэ кэтэһэр.

Ангелина Васильева, »Саха сирэ» хаһыат, edersaas.ru

Ыччат күнэ буолан, болуоссакка оҕолор үҥкүүлүү сылдьыбыттара. Муусука тохтоотун, »иһэллэр, иһэллэр» диэттэрин кытта, бары хайыһа түстүлэр…


Чэчирдээх саламаны күөрэччи тутан, сахалыы таҥастаах уолаттар иһэллэр.

Кинилэр кэннилэриттэн сахалыы маанытык таҥныбыт, толору симэҕин кэппит мэр Сардаана Авксентьева икки арыалдьыттаах, атынан дьоруолатан ааста. Аттарын үүнүттэн дьөһүөлдьүттэр тутан сиэтэ сылдьаллар. »Браво!» диэн хаһыылар иһилиннилэр.

Кинилэр кэннилэриттэн боотурдуу таҥныбыт аттаах дьон, акка олорорго үөрэтэр кулууптар оҕолоро сахалыы таҥнан, хаамтаран аастылар. Аттар бары симэхтээхтэр.
Хаамыы тыаһа-ууһа суох ааста. Сорох аттар сиргэнэн, туора-маары ойуолуохтарын, тута сылдьаллар.
»Манан бүттэ дуо?» — диэн саҥалар иһиллитэлээтилэр. Арааһа, эрдэ эрэннэрбиттэрин курдук, бырабыыталыстыба чилиэннэрэ бары кэриэтэ дьоруолатан ааһыахтара диэн кэтэспиттэрэ, туолбата.
Үгүс дьон хаамыыны батыһан бардылар. Утары көрсүбүт дьон, ордук куорат ыалдьыттара, омуктар, нууччалар интэриэһиргээн ыйыталастылар. Манна диэн эттэххэ, мэрияттан харабыллар, муоста сууйааччылар кытта тахсан, хотуннарын көрөн тураллар. Оттон Сардаана Авксентьева Орджоникидзе болуоссатыгар тиийиитигэр атыттан түһэн, сатыы кэллэ.
Аттаах дьон манна тура түһэн баран, салгыы Үс Хатыҥҥа диэри бардылар.
Орджоникидзе болуоссатыгар сахалыы оһуохай ньиргийэ турар.
9 чааска уулуссалар аһыллан, массыыналар көҥүллүк сүүрдүлэр.

Ангелина Васильева, »Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0