Коронавирус дьаҥа төһө да дьиэҕэ хааччахтанан олорорго күһэйбитин иһин, тулалыыр эйгэни, нэһилиэк иһин-таһын өрө тардыы, ыраастааһын, бэрээдэктээһин үлэлэрэ тыа сирдэригэр өрө көтөҕүллүүлээхтик, тэрээһиннээхтик ыытыллаллар.
Горнай улууһугар Атамай нэһилиэгэр субуотунньуктар хайдах быһыылаахтык тэриллибиттэрин туһунан биһиэхэ улуус административнай хамыыһыйатын эппиэттиир сэкирэтээрэ Саргылаана Васильева иһитиннэрэр:
—Атамай нэһилиэгэр үс ый устатыгар нэһилиэк иһин-таһын ыраастааһын үлэлэрэ тиһиктээхтик тэрилиннилэр. Олохтоохтор тиэргэннэрин иһин-таһын, тэрилтэлэр бэйэлэрин уонна кинилэргэ сыһыарыллыбыт сирдэрин-уоттарын, түөлбэлэринэн ыам ыйын 6-7 күннэриттэн саҕалаан ыраастаатылар.
Д.С.Федорова салайааччылаах, С.И. Иванова биир идэлээх сойуустар бэрэссэдээтэллэрэ көҕүлээһиннээх «Радуга» оҕо саадын кэлэктиибэ субуотунньукка бастакынан таҕыста. Кинилэр бу күннэргэ тэрилтэлэрин тиэргэнин, оҕолор ыһыахтыыр, бэтэрээннэр сынньанар сирдэрин уонна тыыл бэтэрээнэ В.Г.Иванова тиэргэнин ыраастаан, хомуйан бүтэрдилэр. Оттон олохтоох дьаһалта кэлэктиибэ сыһыарыллыбыт сирин-уотун ыраастаан субуотунньук күргүөмнээҕин тэрийдэ. Нэһилиэк тэрилтэлэрэ, оскуола, кулууп уо.д.а. эмиэ сирдэрин-уоттарын хомуйдулар. Маны сэргэ, «Сайдыс» (сал.солб. С.И.Иванова), «Эрчим» (сал.А.М.Яковлева), «Кэскил» ТОС (сал.солб. М.Д.Сергеева) түөлбэлэр олохтоохторо субуотунньукка көхтөөх кыттыыны ыллылар.
Аны, нэһилиэк бөҕүн-саҕын тоҕор сири — сыбаалканы ыраастааһын үлэтэ ыытыллыахтаах. Бу субуотунньукка нэһилиэнньэ көхтөөхтүк кыттар баҕалаах. «Дойдубут сирэ-уота ыраас буолуон баҕарабыт» диэн этэллэр.
Хаартыскалар: нэһилиэк дьаһалтатын тиксэриилэрэ