Өймөкөөн улууһун Төрүтүгэр быйыл эбии быыбардыыр учаастак эбиллэн биэрдэ.
edersaas.ru
Ол курдук, «Дириҥ Үрэх» диэн сиргэ быйыл саҥа аһыллыбыт «Чороон» диэн ыстарааталлар артыаллара баар буолла. Төрүттээҕи быыбардыыр учаастак салайааччыта Свелана Босикова ол учаастак туһунан бу курдук кэпсиир:
— Манна Арассыыйа араас муннугуттан тиийэ кэлэн үлэлии сылдьаллар. Красноярскайтан, Липецкайтан, Саратовтан, Иркутскайтан, Кемероваттан, Бурятияттан, Алтайтан, Сахалинтан, Хакасияттан бааллар. Дьокуускайтан, Уус Алдантан, Намтан уонна Өймөкөөн улуустарыттан саха уолаттара үлэлииллэр. Артыал уопсайа 56 үлэһиттээх. Салайааччылара инженер үөрэхтээх Николай Басалгин Хабаровскайтан сылдьар. Быйыл саҥа арыллан үлэлээн эрэр буолан, эһиилги сууйууга бэлэмниир үлэ бара турар. Бастатан туран, дьон олорор усулуобуйатын тэрийбиттэрэ харахха быраҕыллар. Биһиги көмүс сууйар тэриллэри туруора сылдьар кэмнэригэр, үлэлэрин саамай үгэнигэр түбэстибит. Олорор усулуобуйалара — бэртээхэй. Үлэһиттэр саҥа «евровагоннарга» олороллор. ДЭС-тэн уонна күн батарыайатынан уоттаахтар. Онон тэлэбиисэр да, вайфай сибээс да баар. Күн аайы баанньыктаналлар. Биир «вагончикка» 3 киһи олорор. Биһиги тиийээппитин кытта хонтуораларыгар киллэрбиттэрэ. Хас сарсыарда аайы 8 ч. «планеркалыыллар» эбит. Икки симиэнэнэн үлэлииллэр. Түүн-күнүс 5-тэ аһыыллар. Астара хас да менюлаах.
Күн аайы бу курдук ас арааһын, фрукта сиэтэллэр эбит. Араас омук мустубут. Бары бэйэ-бэйэлэригэр олус истиҥ сыһыаннаахтара харахха быраҕыллар.
Артыал салалтата Өймөкөөн ыччаттарын ордук чорботон бэлиэтииллэр. Онуоха биһиги: «Дойдулаах дьон буоламмыт, санаабытын көтөҕөн этэҕит быһыылаах», — диэн эппиппитигэр, «Үлэһит уонна ураты тулуурдаах дьон олох атыттар, иитиилэригэр, хааннарыгар баар эбит», — диэн сөҕөн кэпсээн, кэккэ холобурдары аҕалан, кырдьык да, уолаттарбытынан киэн туттан кэллибит.
Уонна, биллэн турар, дойдубут айылҕата этиэхтэн кэрэтиттэн сөҕөллөрүн биллэрдилэр. «Киһи дууһатын сынньатар, хараҕын сымнатар Өймөкөөн улууһун сирэ-дойдута, кырдьык да, аан дойдуга аатырыан аатырар эбит», — диэн бэлиэтээтилэр.
Көмүсчүттэр бука бары РФ Төрүт Сокуонугар уларытыылары киллэргэ санааларын эттилэр.
Елена ПОТОЦКАЯ, «Cаха сирэ» хаһыат, edersaas.ru
Хаартыска — Светлана Босикова тиксэриитэ.