«Арктика оҕолоро» Арассыыйатааҕы быраагыраама анал бырайыага оҥоһулла сылдьар.
edersaas.ru
РФ Арктическай зонатын сайдыытыгар туһаайыллыбыт судаарыстыбаннай быраагыраама биир тосхолун чааһа хайдах оҥоһулла сылдьарын туһунан СӨ Арктика сайдыытын уонна Хотугу норуоттар дьыалаларын министиэристибэтин пресс-сулууспата иһитиннэрэр.
Былырыын маннык бырагыраама наадатын туһунан этиини Ил Дархан Айсен Николаев көтөхпүтэ. Кэскиллээх тосхолу Архангельскай, Мурманскай уобаластар, Ненецкэй, Ханты-Мансийскай, Чукотскай автономнай уокуруктар, Карелия уонна Коми өрөспүүбүлүкэлэрэ өйөөбүттэрэ. 2020 с. тустаах докумуону Ил Түмэн народнай дьокутаата Феодосия Габышева Федерация Сэбиэтигэр Арктика уонна Антарктика туһунан мунньахха дьүүллэһиигэ туруорбута. СӨ Арктика сайдыытын уонна Хотугу норуоттар дьыалаларын министиэристибэтин иһинэн оҕо уонна дьиэ кэргэн боппуруостарыгар сыһыаннаах министиэристибэлэр уонна биэдимистибэлэр кыттыылаах бырайыактыыр офис тэриллибитэ. Миниистир Владимир Черноградскай бэлиэтээбитинэн, быһаарыыны эрэйэр сүрүн боппуруостар — Арктика улуустарыттан доруобуйаларын бөҕөргөтүүгэ оҕо айанын уйунуу, уһулуччу айдарыылаах, айылҕаттан талааннаах оҕолор норуоттар икки ардыларынааҕы олимпиадаларга уонна айар куонкурустарга кыттыыларын, төрөөбүт тылынан литература бэччээттэниитин, NordSchool федеральнай порталы өйөөһүн, интэриниэт ситимигэр спутник нөҥүө тахсыыны хааччыйыы.
Үөрэх министиэристибэтэ бу тосхолу олоххо киллэриигэ баар чахчылары, көрдөрүүлэри, холобудары хомуйда. Билигин «Арктика оҕолоро» тосхол РФ Уһук Илини сайыннарыы уонна Үп министиэристибэлэрин көрүүтүгэр киирдэ.
Елена ПОТОЦКАЯ, «Саха сирэ» хаһыат, edesaas.ru
Хаартыка — интэринэттэн.