Сибээс федеральнай оператора өрөспүүбүлүкэ уһук хоту, кытыы сытар оройуоннарын оскуолаларын түргэн интэриниэтинэн хааччыйарга спутниковай оборудование бастакы 25 кэмпилиэгин арктическай улуустарга ыытта.
Аллайыаха, Абый, Үөһээ Дьааҥы, Өймөкөөн, Орто Халыма, Муома, Усуйаана улуустарыгар уопсайа 150 үөрэх тэрилтэлэрэ спутниковай интэриниэккэ холбонуохтара.
edersaas.ru
«Аллараа Халыма Андрюшкино орто оскуолатыгар урут интэриниэт 100 кб/с быстар бытаан этэ, ону былырыын ахсынньы ыйга спутник туруораннар, Арассыыйа атын куораттарын оскуолаларын кытта видеокэмпириэнсийэ ыытабыт. Учууталлар вебинарга кыттан, идэлэрин таһымын үрдэтэр, оҕолор электроннай оскуола мобильнай ресурсатын туһанар кыахтаннылар», — диэн аан дойдутааҕы арктическай оскуола үөрэх бырагыраамматыгар проектнай офиһын дириэктэрэ Наталья Ситникова кэпсээтэ.
Саха сирин нэһилиэнньэтигэр спутниковай интэриниэти ырыынак сыанатыттан чэпчэкитик биэрэргэ кэпсэтии ыыталлар. Түргэн кыамталаах, эниэргийэни көдьүүстээхтик туттар сибээс спутнигын туттарга ити кыаллар боппуруос.
СӨ Үөрэх уонна наука министиэристибэтин иһитиннэриитинэн, кэлэр сылтан Саха сиригэр аан дойдутааҕы арктическай оскуола бырайыага дистанционнай үөрэх ситимин көмөтүнэн хотугу улуустар кыһаларын биир үөрэх ситимигэр түмэ тардыаҕа.
Марианна Тыртыкова, «Саха сирэ», edersaas.ru