Арассыыйа таһымнаах салайааччы: биллиилээх бэлиитиктэр Айсен Николаев ананыытын туһунан туох дииллэрий

Дойду Бэрэсидьиэнэ Владимир Путин ыам ыйын 28 күнүгэр Егор Борисов астаапкатын ылынна, Саха өрөспүүбүлүкэтин баһылыгын эбээһинэһин толорооччунан киин куорат мэрэ Николаевы анаата. Өрөспүүбүлүкэ политическай олоҕор ураты суолталаах сабыытыйаны судаарыстыбаннай үлэһиттэр маннык сыаналыыллар.

Игорь Никитин, норуот дьокутаата, «Саханефтегазсбыт» АУо генеральнай дириэктэрэ:

— Судаарыстыба баһылыга сөптөөх быһаарыыны ылынна. Мин Айсен Николаевы кытары өр сыллартан бииргэ үлэлээбитим. Кини үп миниистиринэн, дьокутаатынан, бэрэсидьиэн уонна бырабыыталыстыба дьаһалтатын салайааччынан, киин куорат баһылыгынан таһаарыылаахтык, салалта саҥа ньымалрын туттан үлэлээбитэ. Олоххо киллэрэр бырайыактара куорат олохтоохторун сэҥээриилэрин ылбыта. Айсен Сергеевич бэйэтин тула түмпүт профессиональнай хамаандата өрөспүүбүлүкэ бигэтик сайдарын хааччыйыаҕар эрэнэбин. 

Виктор Губарев, хомуньуустар лиидэрдэрэ:

— Айсен Николаевка эрэгийиэн салайааччытыгар наада буолар хаачыстыба барыта баар. Бэрэсидиэн Путин ыйааҕар тугу этиэххэ сөбүй? Үлэлиэххэ наада.  Айсен Сергеевиһы биһиги өртөн билэбит, үлэһит быһыытынан сыаналыыбыт. Билэн турар, саҥа баһылыкка үлэ истиилэ уларыйыа, ол эрээри, сыал-сорук оннунан хаалыаҕа.

Евгения Михайлова, ХИФУ ректорын э.т.:

— Айсен Николаев биир сүрүн уратынан, барытыгар улахан эппиэтинэстээҕэ буолар. Үлэҕэ, дьыалаҕа, доҕордоһууга, боппуруостары быһаарыыга. Ол иһин, мээнэ эрэннэриини биэрбэт. Эйэҕэс, үтүө санаалаах, кырдьыгы тутуһар, сөптөөх кэмигэр кытаатар, онон сорох дьоҥҥо тыйыс курдук көстөр. Олус үчүгэй бэлэмнээх, физическэй уонна финансовай үөрэхтээх. Ол тугу биэрэрий? Физика дириҥ толкуйу, оттон финансовай үөрэх үбү-харчыны сатаан булуу үөрүйэҕин иҥэрэр. Сөптөөх уопуттаах, дойду да, өрөспүүбүлүкэ да экономикатын билэр.

Вячеслав Штыров, Федерация Сэбиэтин чилиэнэ:

— Мин Айсен Николаевы эдэр эрдэҕиттэн билэбин. Оччолорго кини «САПИ» пуондатыгар үлэлиирэ, мин «АЛРОСА» генеральнай дириэктэрэ этим. Ол кэмнэртэн биһиги кинини таба көрбүппүт. Мин саҕана Үп миниистиринэн үлэлээбитэ. Кини быһаччы кыттыытынан бүддьүөккэ сыһыаннаах боппуруостар, өрөспүүбүлүкэ федерацияҕа иэһин суох оҥоруу, бүддьүөт систиэмэтин оҥоруу боппуруостара быһаарыллыбыттара. Онуоха бааҥҥа үлэлии үөрүйэх буолан, кэмигэр сөптөөх быһаарыныылар ылыллыбыттара. 

Штыров бэлиэтээн этэринэн, Николаев Саха сирин бырабыыталыстыбатын уонна бэрэсидьиэн администрациятын салайааччытынан олорон, бэлиитикэҕэ ыарахан боппуруостары быһаарар, уопсастыбаннай түмсүүлэри кытары хардарыта сибээстээх үлэлиир, тэрийэр дьоҕурдааҕын көрдөрбүт.

«Өрөспүүбүлүкэ бэлиитиичэскэй тиһигин реформалааһынынан дьарыктаныы, биир мандааттаах уокуругунан уонна партийнай испииһэгинэн быыбардыыр систиэмэҕэ көһүү наадата тирээбит кэмнэригэр бу судургута суох, дьоһуннаах боппуруостары салайбыта», — диэн Федерация Сэбиэтин чилиэнэ бэлиэтиир.

СӨ бастакы бэрэсидьиэнэ, өрөспүүбүлүкэ судаарыстыбаннай сүбэһитэ Михаил Николаев, Айсен Николаевы толкуйдаах салайааччы быһыытынан сыаналыыр: «Арассыыйа таһымнаах салайааччы, ол иһин элбэх федеральнай структураны салайар дьон сыанабылын ылар. Россия бэрэсидьиэнэ Владимир Путинныын көрсүһүүтүгэр, биһиги өрөспүүбүлүкэбит салгыы сайдыытын туһунан кэпсэтиигэ иккиэн ыгылыйбакка, холкутук кэпсэтэллэрин, билэллэрин-көрөллөрүн көрүөххэ сөп».

«Мин киниэхэ доруобуйаны, ситиһиини баҕарабын. Саха сирин баһылыгын талар быыбарга өрөспүүбүлүкэбит олохтоохторо өйүөхтэрэ диэн эрэнэбин», —диэн өрөспүүбүлүкэ бастакы бэрэсидьиэнэ түмүктээтэ.

,