Арассыыйа спордун миниистирэ Дьокуускайга спорт комплекстарыгар сырытта
Арассыыйа спордун миниистирэ Дьокуускайга спорт комплекстарыгар сырытта
Арассыыйа спордун миниистирэ Павел Колобков эрэгиийэн баһылыга Айсен Николаевы кытта Дьокуускайга спорт комплекстарын көрдүлэр.
Бастаан “Дохсун” спорт комплексыгар тиийдилэр. Өрөспүүбүлүкэ баһылыга уонна федеральнай миниистир тириэньэрдэри, кинилэр иитиллээччилэрин кытта көрүстүлэр, ону тэҥэ боксаҕа, тхэквондоҕа, кикбоксиҥҥа, самбоҕа уо.д.а. маастар-кылаастары кэрэхсээтилэр.
“Модун” комплекска Колобков уонна Николаев мас-рестлинг, хапсаҕай саалаларыгар, чэпчэки атлетика манеһыгар уонна уопсай саалаҕа киирэн көрдүлэр. Манна оҕолор спорт национальнай көрүҥнэригэр хайдах дьарыктаналларын билиһиннэрдилэр. Чуолаан, олимпийскай чөмпүйүөн, ССРС спордун үтүөлээх маастара Павел Пинигин уонна Спорка бэлэмнэнии өрөспүбүлүкэтээҕи киинин дириэктэрэ Леонид Спиридонов арыаллааһыннарынан ыалдьыттар тустуу уонна бокса саалатыгар уонна “Триумф” иһинэн спортсменнары чөлүгэр түһэрэр кииҥҥэ сылдьан, үлэни-хамнаһы көрдүлэр.
“Дьокуускай спортивнай эбийиэктэрэ олус аныгылар. Балар бары “Азия оҕолоругар” анаан тутуллубуттара уонна дьарыктанар дьон ахсаана элбээн иһэр. Бу өрөспүүбүлүкэҕэ спорт сайдыытын кыаҕа улаханын көрдөрөр.Өссө спорт национальнай көрүҥнэрин бэлиэтиибин. Оттон мас-рестлинг көрүҥүнэн аан дойду 50 дойдутугар дьарыктаналлар”, — диэтэ федеральнай миниистир.
Айсен Николаев бүгүн түһэрсиллибит сөбүлэһии чэрчитинэн Саха сиригэр дьону физкултууранан уонна спордунан умсугутар үлэ күүһүрүөҕэ, саҥа эбийиэктэр тутуллуохтара диэтэ.
“Биһиги өрөспүүбүлүкэ уонна спорт министиэристибэтин икки ардыларыгар олохтоммут бииргэ үлэлээһинтэн астынабыт. Биһиги сорукпут физическэй култууранан уонна спордунан элбэх киһи дьарыктаныыта, чөл олоххо сыһыарыы буолар. Куоракка бүгүн спорт эбийиэктэрэ тиийбэттэр. Кэнники сылларга ытыы спордугар үчүгэй түмүктэр бааллар. Биһиги киин тутан, спортсменнарбыт Арассыыйаҕа уонна аан дойду таһымыгар тахсалларыгар кыаҕы биэриэхтээхпит”, — диэн Николаев түмүктээтэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова