Бүтүн Арассыыйатааҕы экологическай дьыктаан «Арассыыйа — мин историям» пааркаҕа ыытылынна.
Коронавирус дьаҥын бохсор туһуттан, бэйэ икки ардыгар тэйиччи буолууну тутуһуу ирдэнэринэн, тэрээһиҥҥэ 45 киһи кыттыыны ылла. Тулалыыр эйгэҕэ билиилэрин-көрүүлэрин ХИФУ естественнэй наукаларга институтун устудьуоннара, үлэһит дьон, бочуоттаах сынньалаҥҥа олорооччулар, биисинэс бэрэстэбиитэллэрэ, салалта, экология министиэристибэтин, «Сбербаан» ПАУо, «Анаабыр Алмаастара» үлэһиттэрэ, о.д.а. кытыннылар. Тэрээһини ыытыыга партнердар: «Алроса» АУо уонна Уһук Илин экологическай куттал суох буолуутун пуондата.
Тэрээһин саҕаланыытыгар СӨ Ил Түмэн сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Сахамин Афанасьев куйаар ситиминэн былаһааккаҕа мустубут дьоҥҥо эҕэрдэтин тиэртэ. Тулалыыр эйгэҕэ болҕомтолорун ууралларыгар махтанна, ситиһиилэри баҕарда.
Салгыы РНА Сибиирдээҕи салаатын Ирбэт тоҥ буордаах дойду биологическай кыһалҕаларыгар (криолитозона) институтун наукаҕа сүрүн үлэһитэ Михаил Черосов экодьыктаан ыытыллара уһулуччу суолталааҕын бэлиэтээтэ. «Саха сирэ, Арассыыйа бүттүүнэ, тулалыыр эйгэ харыстабылыгар турунар. Биһиги уонна кэлэр көлүөнэ ыччаппыт олоҕор-дьаһаҕар тулалыыр эйгэбит, айылҕабыт туһалаах буоларыгар, чөл турарыгар билии-көрүү олус наада«, — дэтэ кини.
«Арассыыйа — мин историям» паарка дириэктэрэ Дмитрий Соловьев өрөспүүбүлүкэҕэ экологическай куттал суох буолуутугар хас биирдиилэрэ бэйэлэрин кылааттарын киллэрсэллэрин туһунан толкуйдуулларыгар уонна экологическай дьыктаан ыытыллара сүдү суолталааҕын бэлиэтээн эттэ.
Сорудаҕы толорорго 40 мүнүүтэ бэрилиннэ. Санатан эттэххэ, экодьыктаан сэтинньи 14-21 күннэригэр Экодиктант.рус. порталга онлайн эрэсииминэн ыытыллар.
Былырыын экологическай дьыктааҥҥа тас дойдуга олорор дойдулаахтарбытын сэргэ, Арассыыйаттан барыта 2,8 мөл. киһи кыттыыны ылбыт. Дойду бары эрэгийиэннэрэ бырайыакка кыттыбыттара бэлиэтэнэр.
+1
+1
+1
+1
+1
+1
+1