Арассыыйа бэчээтин күнүгэр судаарыстыбаннай наҕараадалары туттардылар...
Олох-дьаһах - Эдэр саас

Арассыыйа бэчээтин күнүгэр судаарыстыбаннай наҕараадалары туттардылар

Бүгүн, Арассыыйа бэчээтин күнүгэр, 1 №-дээх Бырабыыталыстыба дьиэтигэр өрөспүүбүлүкэ саалатыгар өрөспүүбүлүкэтээҕи сонуннары киэҥник тарҕатар сириэстибэлэр, бэчээт дьыалатын уонна полиграфия эйгэтин бэрэстэбиитэллэригэр судаарыстыбаннай наҕараадалары үөрүүлээхтик туттардылар.

СӨ Ил Дарханын уонна СӨ бырабыыталыстыбатын Дьаһалтатын салайааччы Афанасий Владимиров барыларын Арассыыйа бэчээтин күнүнэн эҕэрдэлээтэ. “Эһиги өрөспүүбүлүкэбит летопиһын суруйаҕыт, былаас аһаҕас буолуутугар көмөлөһөҕүт, дьон-сэргэ настарыанньатыгар сабыдыаллыыгыт, Саха сирин аатын-суолун дойдуга уонна аан дойдуга үрдэтэҕит”, — диэн бэлиэтээтэ Афанасий Семенович. Кини саха суруналыыстыкатыгар көлүөнэлэр солбуктарын үгэһин үрдүктүк сыаналаата, ити 19 үйэ бүтүүтүттэн саҕаланар уонна “Якутские епархиальные ведомости” бастакы эрэгийиэннээҕи хаһыат тахсыытын кытта сибээстээх. Афанасий Владимиров өрөспүүбүлүкэ суруналыыстыкатын аатырдыбыт Николай Кондаков, Феодосий Донской, Нина Протопопова, Олег Якимов, Василий Кириллин, Эдуард Рыбаковскай ааттарын аҕынна.

Бүгүн өрөспүүбүлүкэҕэ полиграфия салаатын уонна кинигэни таһаарыы 30 тахса тэрилтэтэ, сонуннары киэҥник тарҕатар 212 сириэстибэ үлэлииллэр. 1224 киһи Арассыыйа Суруналыыстарын чилиэнинэн буолар.

Өрөспүүбүлүкэ сонуннары киэҥник тарҕатар сириэстибэлэрин араас көлүөнэлэрэ баар, араас көрүүлээхтэр уонна кинилэри идэлэригэр бэриниилээх буолуулара сомоҕолуур.

Афанасий Владимиров үөрүүлээх быһыыга-майгыга судаарыстыба наҕараадаларын уонна махтал суруктары туттарда.

2019 сылга суруналыыстыка эйгэтигэр В.В.Никифоров-Күлүмнүүр аатынан Саха Өрөспүүбүлүкэтин судаарыстыбаннай бириэмийэтэ Евдокия Игнатьевна Избековаҕа, “Саха” НКИХ бырагырааматын ыытааччытыгар, Саха Өрөспүүбүлүкэтин култууратын үтүөлээх үлэһитигэр туттарылынна.

2019 сылга оҕо литературатын эйгэтигэр Николай Егорович Мординов – Амма Аччыгыйын аатынан Саха Өрөспүүбүлүкэтин Ил Дарханын бириэмийэтэ Елена Васильевна Слепцоваҕа – Куорсуннаахха, Арассыыйа Суруйааччыларын сойууһун чилиэнигэр, Саха Өрөспүүбүлүкэтин П.А.Ойуунускай аатынан Судаарыстыбаннай бириэмийэтин лауреатыгар туттарылынна.

“Саха Өрөспүүбүлүкэтин үтүөлээх суруналыыһа” бочуоттаах ааттар “Сунтаар сонуннара” хаһыат эрэдээксийэтин эрэдээктэр-дириэктэригэр Борис Парфеньевич Николаевка уонна “Көмүөл” өрөспүүбүлүкэтээҕи кинигэ кыһатын дириэктэригэр Борис Иванович Павловка иҥэрилиннилэр.

“Саха Өрөспүүбүлүкэтин норуотун хаһаайыстыбатын үтүөлээх үлэһитэ” бочуоттаах ааты “Сахабэчээт” ГАУ генеральнай дириэктэрин солбуйааччы Николай Александрович Молчанов ылла.

Маны тэҥэ “Гражданскай килбиэн” анал бэлиэ хаһаайыннарынан “Аар тайҕа” хаһыат кылаабынай эрэдээктэрэ Геннадий Бечеряков, “Киин куорат” хаһыат кэрэспэдьиэнэ Наталья Кычкина, С.А.Новгородов аатынан “Бичик” национальнай кинигэ кыһатын отделын сэбиэдиссэйэ Лена Попова, “Дабаан” хаһыат эппиэттиир сэкирэтээрэ Ирина Слепцова буоллулар.

Маны сэргэ бастыҥтан бастыҥ суруналыыстар Ил Дархан Махтал суругун, Саха Өрөспүүбүлүкэтин Бырабыыталыстыбатын Грамотатын, СӨ ИЛ Дарханын уонна СӨ бырабыыталыстыбатын Дьаһалтатын салайааччытын Махтал суругун туттулар.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

16 − тринадцать =