«Арассыыйа лиидэрдэрэ» диэн национальнай куонкурус суперфиналыгар Саха сириттэн үс киһи ааста. Түмүгү тохсунньу 15-16 күннэригэр Владивостокка ыытыллыбыт Уһук Илиҥҥи түһүмэх кэнниттэн быһаардылар.
«Суперфиналга Уһук Илин сэттэ эрэгийиэниттэн уопсайа отут кыттааччы ааста. Олортон аҕыс киһи Приморскай кыраайтан кыттыаҕа, алта – Амур уобалаһыттан, алта – Хабаровскай кыраайтан, биэс – Сахалин уобалаһыттан, үс – Саха сириттэн уонна биирдии киһи Магадан уобалаһыттан уонна Камчаткаттан», — диэн «Арассыыйа лиидэрдэрэ» куонкурус салайааччыта Алексей Комиссаров эттэ.
Полифиналга кыттыыны ылбыт дьон санааларын үллэстэллэр.
Ирина Егорова, урбаанньыт, Дьокуускай:
— Тэрийээччилэр сорудахтара олус интэриэһинэйдэр этэ. Манна араас эйгэ барыта хабыллан, хамаанданан үлэлээтибит. Сорудах аайы бииргэ толорор дьоммутун уларыта сырыттыбыт, ол аайы саҥа дьону кытта билсэн иһэр буоллахпыт. Мин икки хамаанданы кытта үлэлээтим. Биир хамаандаҕа Саха сирин кыттааччыларын уонна атын эрэгийиэнтэн сылдьар дьону кытта түбэһэн кыттыбытым. “Арассыыйа лиидэрдэриттэн” ыксаллаах быһыыга-майгыга түргэнник сөптөөх быһаарыныыны ылынарга уопут ыллым.
Наталья Леджинова, Арктикатааҕы култуура уонна искусство институтугар үп-харчы управлениетын начаалынньыга, Дьокуускай:
— Ааспыт сылга “МИНИСТР” өрөспүүбүлүкэтээҕи дьыалабыай оонньууга кыайбытым. Бу уопут “Арассыыйа лиидэрдэригэр” кыттарбар көмө буолла. Саха сиригэр номнуо хамаанданан үлэлииргэ күрэхтэспит буоламмын көрдөхпүнэ, полуфинал сорудахтара онуоха майгыннаһаллар. Мантан ылбыт билиим-көрүүм уонна уопутум инники үлэбэр көмө буолуоҕа.
Бу дьоһуннаах күрэхтэһии суперфиналыгар Саха сирин чиэһин «Таас-Үрэх Нефтегазодобыча» хампаанньа үлэһитэ Василий Гринченко, Дьокуускайдааҕы доруобуйа харыстабылын кииниттэн Иван Луцкан уонна Нерюнгри оройуонун баһылыгын солбуйааччы Артем Фирстов көмүскүөхтэрэ. Кинилэр кулун тутарга Москва куоракка куонкуруһү түмүктүүр түһүмэххэ илин-кэлин түсүһүөхтэрэ. Быйыл “Арассыыйа лиидэрдэрэ” куонкурус үһүс сылын ыытыллар.
CИА.
Айтана Аммосова бэлэмнээтэ.