Соторутааҥҥа диэри ойуурга сылдьар булчуттар, табаһыттар, геологтар, туристар араадьыйа истэн абыранар этибит. Ол эрээри быйыл ыам ыйын 1 күнүттэн араадьыйа биэриилэрэ быстан хаалбыттара. Дьон олорор сириттэн ыраах сылдьар хотугу улуустар табаһыттарыгар, булчуттарыгар, ону тэҥэ, геологтарга араадьыйа иһиллэр буолуо дуо?
Николай КЛЕПАНДИН,
Дьааҥы улууһа, Табалаах.
Ыам ыйын 1 күнүттэн тохтообуттара
Ааҕааччы ыйытыытыгар СӨ Тэлэбиидэнньэ уонна араадьыйа техническэй киинин салайааччытын 1-кы солбуйааччы Андрей РЕБРОВ хоруйдуур:
— 1 №-дээх араадьыйа ыстаансыйата Тулагы нэһилиэгэр турбут 250 кВт кыамталаах передатчик КВ-диапазона Саха сирин хотугулуу-илиҥҥи уонна 100 кВт кыамталаах “Гром” передатчик хотугулуу-арҕаа улуустары хабаллара. 2000 сыллар саҕаланыыларыгар араадьыйа маннык ыстаансыйаларын үлэлэрэ тохтотуллубуттара. Төрүөтэ – улахан кыамталаах передатчиктары судаарыстыба үбүлээһинэ кыччаабыта. Ону тэҥэ, бу тэриллэргэ аналлаах электрическэй вакуум бородууксуйаларын оҥорон таһаарар собуоттар сабыллыбыттара. Онон дойду үрдүнэн Саха сиригэр эрэ үлэлии турбут бүтэһик передатчиктар быйыл ыам ыйын 1 күнүгэр үлэлэрин тохтоппуттара. Бүгүҥҥү күҥҥэ Арассыыйаҕа цифровой тэлэбиидэнньэ уонна араадьыйа сайдыытынан сибээстээн, тус сыаллаах бырагыраама көрүллүүтүн боппуруоһа турар. Чуолаан DAB цифровой араадьыйаны олоххо киллэриигэ. Ол эрээри бу сүүрээн олоххо киирдэҕинэ, эмиэ нэһилиэнньэлээх эрэ пууннары хабыаҕа. Саха сирин-уотун барытын хабар кыах суох. Онон цифровой араадьыйа олоххо киирдэҕинэ, бу да боппуруос быһаарыллар ини диэн эрэнэбит.