Арааһынай уоруулар, арааһынай уоруйахтар… (күннээҕи уоруулары ырытыы)...
Бэрээдэк - Олох-дьаһах

Арааһынай уоруулар, арааһынай уоруйахтар… (күннээҕи уоруулары ырытыы)

Уоруу ханна баҕарар тахсыан сөп: балыыһаттан саҕалаан, бэл диэтэр, библиотекаҕа! Ону таһынан, гостиницаҕа, оскуолаҕа… түүҥҥү кулуубу этэ да барыллыбат. 

edersaas.ru

Ыарыһахха кэлэн баран

Дьокуускай куорат полициятыгар биир балыыһа пациеныттан сайабылыанньа киирбит. Кини полицейскайдарга быһаарбытынан, төлөпүөнүн палаатаҕа хаалларан баран, укуол ыла барбыт. Кэлбитэ — төлөпүөнэ мэлигир.

Оперативниктар уорууга уорбаланааччыны туппуттар — Ньурбаттан төрүттээх, урут сууттана сылдьыбыт 31 саастаах киһи эбит.

Ол күн уорбаланааччы балыыһаҕа билэр киһитигэр кэлбит. Уонна палааталар аттыларынан ааһан иһэн, төлөпүөн сытарын, ким да суоҕун көрөн, өр саарыы барбакка, уоран ылбыт.

Биһилэххэ ымсыырбыт

Эмиэ киин куорат полициятын 2 №-дээх отделыгар аны гостиницаҕа уоруу тахсыбытын туһунан иһитиннэрии киирбит. Биир киһиттэн 14 тыһ. солк. сыаналаах биһилэҕин уорбуттар.

Бу уорууга уорбаланааччы тутуллубут — 34 саастаах киһи. Барыллаан быһаарыынан, уорбаланааччы куоракка харчы өлөрө кэлбит. Уонна бастаан гостиницаҕа түспүт. Онно хоһугар өссө икки киһи баар эбит.

Дьоно куоракка барбыттарын кэнниттэн, биирдэстэрэ остуолга биһилэҕин хаалларбытын көрөн, ону ылан, гостиницаттан тахсан барбыт. Уорбут биһилэҕин 2500 солк. атыылаабыт.

Атын дьахтар суумкатын алҕас ылан баран

Эмиэ Дьокуускай. Эмиэ түүҥҥү кулууп. Биир дьахтар баанын каартатыттан 8 тыһ. солк. харчыны устубуттар. Ол туһунан төлөпүөнүгэр смс-иһитиннэриилэр кэлбиттэр. Полицияҕа эрийбит.

Суһал-ирдиир тэрээһиннэр кэмигэр уорбаланааччы тутуллубут — Өлүөхүмэттэн төрүттээх 23 саастаах кыыс.

Сабаҕалааһын быһыытынан, ити иннинээҕи күн дьахтар «Baks» диско-барга сынньаммыт, онно аттынааҕы остуол кыыһа итиригэр оҕустаран, бэйэтин суумкатын курдук санаан, кини суумкатын алҕас ылан барбыт.

Кэлин атын суумканы ылбытын өйдөөн көрөн, иһин хасыһан, төлөпүөнү ороон таһаарбыт. Онтон төлөпүөн нүөмэригэр «мобильнай баан» холбоно сылдьарын билэн, 8 тыһ. солк. бэйэтин счетугар ыыппыт. Уонна ол харчыны барытын туттубут.

Уоруу тахсыбытын билбэккэ сылдьыбыт

Нам улууһун полициятын оперативниктарыгар гаас хочуолун чэпчэки сыанаҕа батарбыттарын туһунан иһитиннэрии киирбит.

Полицейскайдар ол атыылаабыт киһини бэрэбиэркэлээн быһаарбыттара — кини хочуолу 38 саастаах киһиттэн ылбыт, онтон туһата суоҕуттан атыылыырга быһаарыммыт.

Оперативниктар уоруу туһунан иһитиннэриилэри барытын бэрэбиэркэлээбиттэр эрээри, онно гаас хочуолун уоруу туһунан суох эбит. Ол эрэн, онон тохтоон хаалбакка, салгыы бэрэбиэркэлээбиттэр.

Ол түмүгэр биллибитинэн, гаас хочуолун улуус киинигэр баар биир кыбартыыраттан уорбуттар. Кыбартыыра хаһаайына онно олорбот, сылдьыбатаҕа ырааппыт эбит. 30 тыһ. солк. сыаналаах хочуолун уорбуттарын кини оперативниктартан билбит, — дьиэтин баран көрөрүгэр эппиттэригэр.

Уорууга уорбаланааччы кимин эмиэ быһаарбыттар — улуус киинин 36 саастаах олохтооҕо. Бу киһи хочуолу уоран баран, 38 саастаах билэр киһитигэр кистээн эрэригэр көрдөспүт. Онуоха бу киһибит сөбүлэспит, онтон 7 тыһ. солк. сыанаҕа билэр киһитигэр атыылаабыт. Ол онтон сылтаан барыта биллибит.

Спортсаалаҕа спордунан эрэ дьарыктамматтар

Мэҥэ Хаҥалас улууһун полициятын холуобунай ирдэбилгэ оперативниктара 13 саастаах уол төрөппүттэриттэн уоллара суотабай төлөпүөнүн сүтэрбитин-суоҕун билэллэригэр көрдөспүттэр.

Чахчыта даҕаны, уоллара спортсаалаҕа сылдьан баран, 20 тыһ. солк. сыаналаах төлөпүөнүн сүтэрбит эбит. Ону дьонугар эппэтэх.

Оттон 21 саастаах киһи төлөпүөннэнэн хаалбыт. Бэрэбиэркэ кэмигэр биллибитинэн, төлөпүөнү спортсаалаттан бу эдэр киһи сойбоппут эбит.

Ол күн футбол оонньообуттар. Онуоха биир үөрэнээччи төлөпүөнүн хаалларбытын көрөн, бэйэтигэр ылбыт. Уолчаан төлөпүөнүн сүтэрэн, спортсаалаҕа баар дьонтон барыларыттан «көрбүккүт буолаарай?» диэн ыйыталаспытын, көрдөөбүтүн да үрдүнэн, саҥарбатах.

Күн аайы уора кэлбит

Томпо улууһун полициятыгар библиотека үлэһитэ эрийэн, кини баанын счетуттан харчытын устубуттарын туһунан иһитиннэрбит. Үс күн устатыгар 3 тыһ. солк. тахса сууманы уорбуттар.

Оперативниктар харчыны кыра кыралаан устубуттарыттан сэдиптээн, бастаан эмсэҕэлээччи чугастааҕы дьоно буолуохтарын сөбүн бэрэбиэркэлээн көрбүттэр — ол тута бигэргэммэтэх. Салгыы суһал-ирдиир тэрээһиннэр кэмигэр уорбаланааччы кимин быһаарбыттар — сөҕүөх иһин, бу библиотекаҕа куруук сылдьар 28 саастаах ааҕааччылара эбит.

Барыллаан быһаарыынан, уорбаланааччы уһун сыллар усталарыгар библиотекаҕа орох тэппит бэйэтэ, биир күн библиотека үлэһитэ остуолугар төлөпүөнүн куруук хаалларар идэлээҕинэн туһанан, харчытыттан бэйэтин счетугар ыыппыт. Оннук күн аайы кэлэн, кыралаан уста сылдьыбыт.

Библиотекарь быһаарбытынан, куруук сылдьар ааҕааччы олох аҕыйах, онон кинилэртэн кими эмит уорбалыаҕын санаата буолбатах.

«Уоруу» ыстатыйанан холуобунай дьыалалар тэриллибиттэр. Бу туһунан СӨ ИДьМ-тын пресс-сулууспата иһитиннэрдэ.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

14 − 12 =