Саха сирэ көмүһү уонна алмааһы хостуур “Полюс”, “АЛРОСА” хампаанньалары кытары энергетиканы сайыннарыыга Москваҕа Уһук
Илин эрэгийиэннэрин күннэрин чэрчитинэн дуогабар түһэристэ. Ил Дархан Айсен Николаев, хампаанньа салайааччылара Павел Грачев, Сергей Иванов илии баттастылар.
Бу дуогабарга Иркутскай уобалас Бодойботооҕу инвестиционнай бырайыактарын уотунан хааччыйарга, Саха сирин Орто Ботуобуйатааҕы ньиэп, гаас конденсааттаах сири сайыннарыыга, Саха сирин арҕаа оройуоннарын энергетикатын тупсарыыга туһуланна.
Манна даҕатан эттэххэ, эһиилгиттэн “Полюс” хампаанньа Иркутскай уобаласка икки сиргэ улахан бырайыагын киллэрэн барыахтаах. Оттон “АЛРОСА” Орто Ботуобуйатааҕы сирин туһаҕа таһаарыахтаах. Онон бу бырайыактарга энергетиканы туһаныы күүһүрүөхтээх. Итинэн сибээстээн, Саха Өрөспүүбүлүкэтин бырабыыталыстыбата нэһилиэнньэлээх пууннар энергетикаларын тупсарыыны, гаас киллэриитин туруорсар. Бу үөһээ ааттаммыт дуогабарга Орто Ботуобуйатааҕы ньиэп, гаас конденсаттаах сиртэн ситим тардыллан, гааһынан барар электростанция тутуутун бырайыага баар. Бу станция, быһа холуйан, 200 МВт кыамталаах буолуохтаах.
Дуогабарга өссө Светлэйдээҕи гидроэлектростанция (Бүлүүтээҕи ГЭС) төрдүс энергоблогун тутуу боппуруоһа көрүллэр. Ону таһынан, оробуочай бөлөх тэриллэн, атын да эбийиэктэргэ үлэлэһии барыахтаах.
Онон Иркутскай уобалас уонна Саха сирэ энергетикаҕа кыттыгас бырайыактарын үлэлэтиэхтэрэ.
Аграфена КУЗЬМИНА, “Саха сирэ” хаһыат.