Бүгүн,сэтинньи 1 күнүгэр, Хомус аан дойдутааҕы түмэлин дьиэтигэр дьоро күн буолла. Саха хомуһун чинчийээччи,тарҕатааччы,үөрэнээччилэргэ хомуска бастакы научнай практическай конференцияны тэрийбит уонна авторскай курстары үөрэтээччи Антонина Константиновна Никитина үбүлүөйүгэр аналлаах айар киэһэтэ буолла.
edersaas.ru, Марта Николаева
Хомус барахсан дьүрүһүйэр тыаһын оҕо эрдэҕиттэн сүрэҕэр-быарыгар иҥэринэн улааппыт, ону сүрэҕин ымыыта оҥостон, Антонина Константиновна билигин да айар үлэ үөһүгэр сылдьар. Сайыҥҥы өттүгэр лааҕыры аһан үлэлэппитин сэргэ,төрөөбүт нэһилиэгэр Тойбохойдооҕу музейга хомус хоһун аһан үлэлии сылдьар. Антонина Константиновна хомуска аналлаах хас да кинигэ ааптара. Маны сэргэ хомус уустара оҥорбут хомустарын коллекционера,Сунтаар улууһун хомусчуттарын, маастардарын туһунан кинигэлээх. Бүгүҥҥү дьоро киэһэтин бастакы түһүмэҕэ алгыһынан саҕаланна.
Иккис түһүмэххэ Антонина Константиновналыын истиҥ иһирэх кэпсэтиини суруналыыс Марта Николаева тэрийэн ыытта. Антонина ис дууһатыттан арыллан олорон төрүттэрин, ийэлээх аҕатын туһунан кэпсэтииттэн саҕаланна. Антонина кыра оҕо эрдэҕиттэн хомуһу сэргиирин таһынан,бэйэтэ эмиэ оонньуур эбит. Ол иһин төрөппүттэрэ хомус ууһуттан хомус атыыласпыттар. Ол төлөбүрэ уус үлэһиитинэн,Владивостокка үөрэнэр убайыгар Анатолийга илим сакаастаан туран төлөспүттэр. Хомуска тардыһыытын ийэлээх аҕата сахпыттар эбит дии санаатым.
Антонина коллекционер быһыытынан 70-тан тахса хомустаах.
Кини түөлбэтин хомуһун чинчийэригэр үөрэтээччитэ,профессор,аан дойдуга хомусчут быһыытынан биллэр Иван Егорович Алексеев сорудах биэрэн,боломуочунай быһыытынан чинчийэр үлэтин саҕалаабыта. Ол да дьарыгын ыһыктыбакка сылдьар. Бу үтүө киэһэҕэ Антонина коллекциялаабыт хомустарын дьүрүһүттүлэр.Ол курдук Амынньыкы уус хомуһун профессор,хомусчут Иван Алексеев,Барылаан уус хомуһун Роман Готовцев, Хабычча уус — Альбина Дегтярева, Уол Сыҥырыа — Николай Жирков, Лука Тимофеев хомуһун — Мария Данилова, аныгы үйэ маастардарын хомуһун: Василий Уаров — Татьяна Жиркова, Егор Тартаков хомуһун — Эркин Алексеев, Дмитрий Николаев хомуһун — Дмитрий Бястинов, Кирилл Петров хомуһун — Андрей Федоров оонньоон иһитиннэрдилэр.
Антонина Константиновнаҕа үтүө тылларын хомуска учуутала,профессор Иван Алексеев,техническэй наука кандидата,уустар республикатааҕы ассоциацияларын салайааччыта Николай Бурцев, ЕНМЦ урукку директора, культура бэтэрээнэ,үтүөкэннээх салайааччы Г.Г.Софронов,культура талааннаах методиһа Зоя Сысолятина,СӨ үтүөлээх артыыһа Дмитрий Иванов,Тоҕой Сэлэ куораттааҕы түмсүүтүттэн,а вторскай курсун үөрэнээччилэрэ,Тойбохойтон учуутала А.А.Мохова,сүгүрүйээччилэрэ махтал,алгыс тылларын эттилэр,айар үлэтин үрдүктүк сыаналаатылар. Сахалыы истиҥ кэпсэтии манна этилиннэ,хомус дорҕооно куйаарга дьүрүһүйдэ. Күндү талааннаах биир дойдулаахпыт,хомуһу чинчийээччи,тарҕатааччы,үөрэтээччи Антонина Константиновнаҕа махтанан туран, ат тарпат алгыһын,соноҕос тарпат соргутун баҕарабыт.
Хомус дьоро түһүлгэтиттэн Марта Николаева, edersaas.ru