Өрөспүүбүлүкэтээҕи 2 №-дээх балыыһа-Суһал медицинскэй көмө киинин колопроктология отделениетын ыстаарсай медицинскэй сиэстэрэтэ Валентина Алешина уонна приемнай отделение медицинскэй сиэстэрэтэ Саргылана Колесова бэйэлэрин ыарыһахтарыгар көмөлөһөргө идэлээх сойуустарыттан көмө көрдөөтүлэр.
edersaas.ru
– Кинилэр проктология отделениетыгар 27 саастаах эдэркээн ыарыһахтара Андрей Чемезовка көнө оһоҕос үһүс истиэпэннээх искэнин булбуттарын, кинини Кореяҕа эпэрээссийэлиэхтээхтэрин туһунан кэпсээбиттэрэ уонна киниэхэ көмөлөһөн аһымал дьаарбаҥканы ыытарга этии киллэрбиттэрэ. Андрей төрөппүттэрэ суох, кимтэн да көмө күүтэр кыаҕа суох. Биһиги кылаабынай бырааспытыгар эппиппитин өйөөбүтэ. Алтынньы 22 күнүгэр ыыппыт дьаарбаҥкабытыгар балыыһа 21 отделениета кытынна. Отделениелар өссө эбии 153 тыһыынча солкуобай харчыны хомуйдулар. Мин, чуолаан Андрейга көмөлөһөргө этии киллэрбит приемнай (ыстаарсай медицинскэй сиэстэрэ Лия Шарипова) уонна колопроктология (ыстаарсай медицинскэй сиэстэрэ Валентина Алешина) отделениеларын итиэннэ дьаарбаҥканы тэрийэргэ көхтөөхтүк кыттыбыт стерилизациялыыр кииннэммит отделение (ыстаарсай медицинскэй сиэстэрэ Валентина Ветрова) кэлэктииптэрин бэлиэтиэхпин баҕарабын, — — диэн балыыһа профкомун бэрэссэдээтэлин эбээһинэһин толорооччу Марианна Атласова иһитиннэрэ.
“Андрей Чемезов Өрөспүүбүлүкэтээҕи 2 №-дээх балыыһаҕа доруобуйатын көрдөрүнэ бэйэтэ кэлбитэ. Эдэр киһини приемнай отделениеҕа көрөн-истэн баран, колопроктология отделениетыгар киллэрбиттэрэ уонна “көнө оһоҕос нижнеампулярнай отделын араага” диэн быһаарбыттара. Андрюшаҕа ыарыытын эппиттэригэр олус санаарҕаабыта… Ол гынан баран, кини кытаанах санаалаах, бэйэтин көрүнэ үөрэммит, бигэ тирэхтээх, — диэтэ Валентина Алешина уолга эрэнэрин биллэрдэ.
Андрей чугас дьоно суоҕун билэн, отделение үлэһиттэрэ көмөлөһөргө быһаарынан, биир идэлээхтэриттэн көрдөспүттэрэ.
“Мин 27 эрэ саастаахпын. Мин олох олоруохпун наһаа баҕарабын!” – диэн Андрей бэйэтин Инстаграмыгар суруйбута.
Андрей Чемезов билигин Соҕуруу Кореяҕа баар, киниэхэ икки уустук эпэрээссийэни оҥоруохтаахтар. Балыыһа профкома кинини кытары сибээстэһэ олорор.
Биллэн турар, Андрей эпэрээссийэлэнэн баран, доруобуйатын чөлүгэр түһэрэригэр бириэмэ уонна көмө наада. Онон, киниэхэ көмөлөһүөн баҕалаах үтүө санаалаах дьоҥҥо кини реквизиттарын санатабыт:
Получатель: Чемезов Андрей Эдуардович.
Мобильный банк: +7(984) 100 45 63
Номер счета: 4081 7810 5760 0740 3510
Банк получателя: Якутское отделение #8603
ПАО Сбербанк БИК: 0498 05609 ИНН: 77070 83893
КПП: 143502001
Инстаграмар страницата: instagram.com/spasi_chemeza
“Саха сирэ”, edersaas.ru cайтка анаан Зоя ИГНАТЬЕВА