Ороһуоспа күн режиссер Андрей Борисов биир идэлээхтэригэр, доҕотторугар сабыс-саҥа тахсыбыт кинигэтин билиһиннэрдэ, үөрүүтүн үллэһиннэ. Манна “Андрей Борисов и путь Саха театра. Избранное” диэн тыһыынча ахсаанынан “Бичик” кыһаҕа тахсыбыт кинигэ I томугар талыллыбыт ыстатыйалар, интервьюлар уонна рецензиялар киирбиттэр.
Талыллыбыт айымньылар хас даҕаны томнаах буолуохтара. Бастакы том “Андрей Борисов: “Эстетика “Желанного берега” продолжается” диэн бастакы түһүмэҕэр Андрей Борисов искусство, тыйаатыр, аныгы кэмҥэ култуура сайдыытын туһунан полемическэй этиилэрэ, санаалара, толкуйдара киирдилэр.
Иккис түһүмэх улахан кээмэйдээх. Манна ааҕааччы, талааннаах режиссер П.Ойуунускай аатынан Саха академическай тыйаатырыгар уонна Олоҥхо тыйаатырыгар туруорбут испэктээкиллэрин туһунан, 1982 сыллаахха “Социалистическая Якутия” хаһыакка тахсыбыт “Хаарыан хампа күөх кытылым…” испэктээкил премьератын аан бастаан Агафья Захарова сырдатыытыттан саҕалаан, театроведтар, искусствоведтар, суруналыыстар араас сылларга суруйууларын барытын бииргэ тутан олорон билсиэхтэрэ.
Манна биири бэлиэтиэм этэ: биһиги “Саха сирэ” хаһыаппытыгар бэчээттэммит, холобурга, Рустам Каженкин 2007 с. олунньуга Күлүмнүүр туһунан (Саха тыйаатырыгар 2006 с. бүтүүтэ турбута) “Бастыҥ хатыыта” испэктээкил, Гаврил Андросов 2011 с. сэтинньигэ “Эллэй Боотур” испэктээкил премьераларыгар рецензиялара нууччалыы тылбаастаммыттарын (М.Докторова, Н.Винокурова) киһи олох саҥалыы, сонуннук, атын хараҕынан ааҕар эбит…
Кинигэ «Андрей Борисов: «Желанный берег — Театр Олонхо» диэн үһүс түһүмэҕэр Андрей Борисов киин прессаҕа биэрбит интервьюта, ыстатыйалар, «Олоҥхо дойдута» инновационнай бырайыак туһунан санаалар, тыйаатыр олоҕуттан, гастролларыттан элбэх хаартыска бааллар.
Кинигэни Валентина Чусовская, Валентина Павлова, Ефим Степанов, Олег Сидоров хомуйан оҥорбуттар.
Татьяна МАРКОВА, «Саха сирэ» хаһыат, edersaas.ru